ബിസിസിഐയോട് വിദേശ ലീഗില്‍ കളിക്കുവാന്‍ യുവരാജ് അനുമതി തേടി

അന്താരാഷട്ര ക്രിക്കറ്റില്‍ നിന്ന് വിരമിച്ച് ഒരാഴ്ചയ്ക്കകം തന്നെ വിദേശ ടി20 ലീഗില്‍ കളിയ്ക്കുവാനുള്ള അനുമതി തേടി ബിസിസിഐയെ സമീപിച്ച് യുവരാജ് സിംഗ്. താരം വിരമിക്കല്‍ തീരുമാനം അറിയിക്കുന്ന സമയത്ത് തന്നെ തന്റെ ഇനിയുള്ള ലക്ഷ്യം ഇത്തരം ലീഗുകളില്‍ പങ്കെടുക്കുകയെന്നതാണെന്ന് അറിയിച്ചിരുന്നു. ഇപ്പോള്‍ ബിസിസിഐയെ ഇതിനു വേണ്ടി താരം സമീപിച്ചുവെന്നാണ് ലഭിയ്ക്കുന്ന റിപ്പോര്‍ട്ടുകള്‍.

ടി20 ക്രിക്കറ്റ് തനിയ്ക്ക് ഇനിയും കളിയ്ക്കണമെന്നും ഐപിഎല്‍ പോലുള്ള വലിയ ടൂര്‍ണ്ണമെന്റിന്റെ സമ്മര്‍ദ്ദമില്ലാതെ വിദേശ ടി20 ലീഗില്‍ കളിയ്ക്കുകയാണ് തന്റെ ലക്ഷ്യമെന്നും യുവരാജ് റിട്ടയര്‍മെന്റ് സമയത്ത് പറഞ്ഞിരുന്നു. ബിസിസിഐ മുമ്പ് വീരേന്ദര്‍ സേവാഗ്, സഹീര്‍ ഖാന്‍ എന്നീ താരങ്ങളെ ടി10 ലീഗില്‍ കളിയ്ക്കുവാന്‍ അനുമതി നല്‍കിയിരുന്നു. ഇരുവരും അന്താരാഷ്ട്ര ക്രിക്കറ്റില്‍ നിന്നും ഫസ്റ്റ്-ക്ലാസ് ക്രിക്കറ്റില്‍ നിന്നും വിരമിച്ച ശേഷമായിരുന്നു ഈ തീരൂമാനം.

എന്നാല്‍ ബിസിസിഐ അടുത്തിടെ ഹോങ്കോംഗ് ടി20 ലീഗില്‍ യൂസഫ് പത്താന് നല്‍കിയ എന്‍ഒസി പിന്‍വലിച്ചിരുന്നു. അതേ സമയം ഫസ്റ്റ് ക്ലാസ് ക്രിക്കറ്റില്‍ സജീവമായിരിക്കെ ഇര്‍ഫാന്‍ പത്താന് പ്ലേയര്‍ ഡ്രാഫ്ടില്‍ ഉള്‍പ്പെടുവാനുള്ള അവസരം ബിസിസിഐ നല്‍കുകയും ചെയ്തിരുന്നു.

Previous articleകോപ അമേരിക്കയിൽ ആദ്യ ജയം നേടി പെറു
Next articleഗോളടിക്കാരൻ മാർക്കസ് ഗോകുലത്തിൽ തുടരും