കാണികളുടെ പെരുമാറ്റം പ്രതീക്ഷിച്ചത്, അവ നേരിടുവാന്‍ തയ്യാറെടുത്ത് തന്നെയാണ് എത്തിയത്

0
കാണികളുടെ പെരുമാറ്റം പ്രതീക്ഷിച്ചത്, അവ നേരിടുവാന്‍ തയ്യാറെടുത്ത് തന്നെയാണ് എത്തിയത്

പന്ത് ചുരണ്ടല്‍ വിവാദത്തിനു ശേഷം ഒരു വര്‍ഷത്തെ വിലക്ക് നേരിട്ട് വീണ്ടും ക്രിക്കറ്റ് കളത്തിലേക്ക് എത്തിയ ഡേവിഡ് വാര്‍ണറെയും സ്റ്റീവന്‍ സ്മിത്തിനെയും ഇംഗ്ലണ്ടിലെ കാണികള്‍ വരവേറ്റത്ത് കൂകി വിളികളോടു കൂടിയാണ്. സന്നാഹ മത്സരത്തില്‍ ഇവയെ മറികടന്ന് സ്മിത്ത് ശതകം നേടിയപ്പോള്‍ ഇന്നലെ ബ്രിസ്റ്റോളില്‍ മികച്ച പ്രകടനം പുറത്തെടുക്കുവാനുള്ള നിയോഗം വാര്‍ണര്‍ക്കായിരുന്നു. താരം ഇന്നലെ പുറത്താകാതെ 89 റണ്‍സ് നേടിയാണ് ഓസ്ട്രേലിയയെ വിജയത്തിലേക്ക് നയിച്ചത്.

തന്റെ പതിവ് ശൈലിയില്‍ അല്ലെങ്കിലും നിര്‍ണ്ണായക പ്രകടനമാണ് വാര്‍ണര്‍ ഇന്നലെ പുറത്തെടുത്തത്. ഇന്നലെയും പ്രതീക്ഷിച്ച പെരുമാറ്റം തന്നെയാണ് കാണികളില്‍ നിന്ന് നേരിട്ടത്. ബ്രിസ്ബെയിനിലെ ക്യാമ്പില്‍ തന്നെ ഇതിനെക്കുറിച്ച് തങ്ങള്‍ വിശദീകരിച്ചുവെന്ന് ഓരോരുത്തരും ഇതിനെക്കുറിച്ച് ചര്‍ച്ച ചെയ്തിരുന്നുവെന്നാണ് ഓസ്ട്രേലിയന്‍ ടീമംഗങ്ങള്‍ വെളിപ്പെടുത്തിയത്. ഈ പെരുമാറ്റത്തെ എങ്ങനെ നേരിടുമെന്നും എങ്ങനെ പ്രതികരിക്കുമെന്നു ടീം കൂട്ടായി ചര്‍ച്ച ചെയ്തതാണെന്നാണ് ഓസ്ട്രേലിയന്‍ താരം ആഡം സംപയും പറയുന്നത്.

ഇംഗ്ലണ്ടില്‍ സാധാരണ വരുമ്പോള്‍ തന്നെ ഇത്തരം കാര്യങ്ങളാണ് പ്രതീക്ഷിക്കുന്നതെന്ന് പറഞ്ഞ നഥാന്‍ കോള്‍ട്ടര്‍-നൈല്‍ ഇത്തവണ കാര്യങ്ങള്‍ കൂടുതല്‍ ശ്രമകരമാവുമെന്ന് തങ്ങള്‍ക്ക് അറിയാമായിരുന്നുവെന്നും പറഞ്ഞു. സ്ക്വാഡിലെ ഓരോരുത്തുരും ഇതിനു വേണ്ടി തയ്യാറെടുപ്പ് നടത്തിയെന്നും കോള്‍ട്ടര്‍-നൈല്‍ വ്യക്തമാക്കി.