വിന്ഡീസിനെതിരെ ഇംഗ്ലണ്ടിന്റെ ടി20 ടീമില് ഇടം പിടിച്ച് സാം കറന്. മോയിന് അലിയ്ക്ക് വിശ്രമം നല്കുവാന് ബോര്ഡ് തീരുമാനിച്ചതോടെയാണ് സാം കറനു നറുക്ക് വീണത്. ലോകകപ്പ് വരാനിരിക്കെ താരങ്ങള്ക്ക് മതിയായ വിശ്രമം ആവശ്യമായതിനാലും മോയിന് അലിയെപ്പോലെ ബെന് സ്റ്റോക്സ്, ജോസ് ബട്ലര് എന്നിവരും ഐപിഎല് കളിക്കാനിരിക്കുന്നതിനാലാണ് ഇവര്ക്ക് വിന്ഡീസിനെതിരെയുള്ള ടി20 പരമ്പരയില് വിശ്രമം നല്കുവാന് ഇംഗ്ലണ്ട് തീരുമാനിച്ചത്. മോയിന് അലി റോയല് ചലഞ്ചേഴ്സ് ബാംഗ്ലൂരിനും ബെന് സ്റ്റോക്സും ജോസ് ബട്ലറും രാജസ്ഥാന് റോയല്സിനു വേണ്ടിയുമാണ് ഐപിഎലില് കളിക്കുന്നത്.
അതേ സമയം സാം കറനെ ഐപിഎലില് കിംഗ്സ് ഇലവന് പഞ്ചാബ് സ്വന്തമാക്കിയിട്ടുണ്ടെങ്കിലും താരം ഏകദിന പരമ്പരയില് ഇംഗ്ലണ്ടിനു വേണ്ടി കളിക്കാത്തതിനാലാണ് ടി20 പരമ്പരയ്ക്കുള്ള ടീമില് ഉള്പ്പെടുത്തിയിരിക്കുന്നത്. മാര്ച്ച് 23നു ഐപിഎല് ആരംഭിക്കുവാനിരിക്കെ ഇംഗ്ലണ്ടിന്റെ കരിബീയന് ടൂര് മാര്ച്ച് 10ന് ആണ് അവസാനിക്കുന്നത്.
