പാകിസ്ഥാൻ സൂപ്പർ ലീഗ്: പന്തിൽ ജേഴ്സിയിലെ ചായം പടർന്നു; ആദ്യ മത്സരം ‘പിങ്ക് ബോൾ’ മത്സരം ആയി
പാകിസ്ഥാൻ സൂപ്പർ ലീഗിന്റെ (PSL) 2026 സീസൺ തുടക്കത്തിൽ തന്നെ വലിയൊരു നാണക്കേടിന് സാക്ഷ്യം വഹിച്ചു. ലാഹോറിലെ ഗദ്ദാഫി സ്റ്റേഡിയത്തിൽ നടന്ന ലാഹോർ ഖലന്ദേഴ്സ് – ഹൈദരാബാദ് കിംഗ്സ്മെൻ ഉദ്ഘാടന മത്സരത്തിനിടെ വെളുത്ത പന്തിന് നിറം മാറ്റം സംഭവിച്ചതാണ് വിവാദമായത്. ഹൈദരാബാദ് ടീമിലെ കളിക്കാർ പന്തിന് തിളക്കം കൂട്ടാനായി തങ്ങളുടെ ജേഴ്സിയിൽ തുടർച്ചയായി ഉരസിയതോടെ, ജേഴ്സിയിലെ മെറൂൺ ചായം പന്തിലേക്ക് പടരുകയായിരുന്നു. ഇതോടെ വെളുത്ത പന്ത് ക്രമേണ പിങ്ക് നിറത്തിലേക്കും പിന്നീട് കടും ചുവപ്പിലേക്കും മാറി.
ഹൈദരാബാദ് ക്യാപ്റ്റനും ഓസ്ട്രേലിയൻ താരവുമായ മാർനസ് ലബുഷെയ്ൻ ഈ വിചിത്രമായ സംഭവത്തിൽ കടുത്ത അതൃപ്തി രേഖപ്പെടുത്തി. തന്റെ കരിയറിൽ ഇതുവരെ ഇങ്ങനെ ഒരു അനുഭവം ഉണ്ടായിട്ടില്ലെന്ന് അദ്ദേഹം മത്സരശേഷം പറഞ്ഞു. രണ്ടാം ഓവറിൽ തന്നെ പന്തിന് ചുവപ്പ് നിറമാകുന്നത് ശ്രദ്ധയിൽപ്പെട്ടപ്പോൾ അദ്ദേഹം അമ്പയർമാരോട് പരാതിപ്പെട്ടിരുന്നു. പന്തിന് നിറം മാറിയതോടെ 15-ാം ഓവറിൽ അമ്പയർമാർ പന്ത് മാറ്റാൻ നിർബന്ധിതരായി.
ജേഴ്സിയുടെ ഗുണനിലവാരമില്ലായ്മയാണ് ഇതിന് കാരണമായതെന്ന വിമർശനവുമായി സോഷ്യൽ മീഡിയയിൽ ആരാധകർ രംഗത്തെത്തിയിട്ടുണ്ട്.
മത്സരത്തിൽ ലാഹോർ ഖലന്ദേഴ്സ് 69 റൺസിന് ഹൈദരാബാദിനെ പരാജയപ്പെടുത്തി. ആദ്യം ബാറ്റ് ചെയ്ത ലാഹോർ 199 റൺസെടുത്തപ്പോൾ ഹൈദരാബാദിന് 130 റൺസ് മാത്രമാണ് നേടാനായത്.