തന്റെ രണ്ടാം മത്സരത്തിലും അര്‍ദ്ധ ശതകം നേടി ഇന്ത്യന്‍ ഓപ്പണര്‍ പൃഥ്വി ഷാ. തന്റെ സ്വതസിദ്ധമായ ശൈലിയില്‍ 39 പന്തില്‍ നിന്ന് അര്‍ദ്ധ ശതകം തികച്ച പൃഥ്വിയുടെ ബാറ്റിംഗ് മികവില്‍ ആദ്യ സെഷന്‍ അവസാനിക്കുമ്പോള്‍ ഇന്ത്യ 16 ഓവറില്‍ നിന്ന് 80 റണ്‍സാണ് നേടിയിട്ടുള്ളത്. 4 റണ്‍സ് നേടിയ കെഎല്‍ രാഹുല്‍ രണ്ടാം ടെസ്റ്റിലും പരാജയപ്പെട്ടപ്പോള്‍ 9 റണ്‍സുമായി ചേതേശ്വര്‍ പുജാരയാണ് പൃഥ്വിയ്ക്ക് കൂട്ടായിയുള്ളത്. പൃഥ്വി ഷാ 52 റണ്‍സ് നേടി.
നേരത്തെ വിന്‍ഡീസിന്റെ ഒന്നാം ഇന്നിംഗ്സ് 311 റണ്‍സില്‍ ഇന്ത്യ അവസാനിപ്പിച്ചിരുന്നു. ശേഷിക്കുന്ന മൂന്ന് വിക്കറ്റുകളും നേടി ഉമേഷ് യാദവ് ആണ് വിന്‍ഡീസ് ഇന്നിംഗ്സിനു അന്ത്യം കുറിച്ചത്. റോഷ്ടണ്‍ ചേസ്(106) തന്റെ ശതകം പൂര്‍ത്തിയാക്കിയ ശേഷം പുറത്താകുകയായിരുന്നു.
