അഫ്ഗാനിസ്ഥാനെതിരെ രണ്ടാം ഏകദിനത്തിൽ മികച്ച സ്കോര്‍ നേടി ബംഗ്ലാദേശ്. ഇന്ന് ടോസ് നേടി ബാറ്റിംഗ് തിരഞ്ഞെടുത്ത ബംഗ്ലാദേശ് ലിറ്റൺ ദാസിന്റെയും മുഷ്ഫിക്കുര്‍ റഹിമിന്റെയും മികവിൽ 306/4 എന്ന സ്കോര്‍ നേടുകയായിരുന്നു.
തമീം ഇക്ബാലിനെയും(12), ഷാക്കിബ് അല്‍ ഹസനെയും(20) നഷ്ടമായ ശേഷം ലിറ്റൺ ദാസും മുഷ്ഫിക്കുര്‍ റഹീമും ചേര്‍ന്ന് 202 റൺസാണ് മൂന്നാം വിക്കറ്റിൽ നേടിയത്. ഇന്നിംഗ്സിന്റെ അവസാനത്തോടെ 136 റൺസ് നേടിയ ലിറ്റൺ ദാസ് പുറത്തായി അടുത്ത പന്തിൽ 86 റൺസ് നേടിയ മുഷ്ഫിക്കുറും പുറത്തായി.
285/2 എന്ന നിലയിൽ നിന്ന് അടുത്തടുത്ത പന്തുകളിൽ ഇരുവരുടെയും വിക്കറ്റുകള്‍ നഷ്ടമായപ്പോള്‍ ബംഗ്ലാദേശ് 285/4 എന്ന നിലയിലേക്ക് വീണു. ഫരീദ് അഹമ്മദിനായിരുന്നു രണ്ട് വിക്കറ്റും. പിന്നീട് കഴിഞ്ഞ മത്സരത്തിലെ ഹീറോ അഫിഫ് ഹൊസൈന്‍ 13 റൺസ് നേടി ടീം സ്കോര്‍ 300 കടത്തി.
