രാജസ്ഥാൻ റോയൽസിന്റെ വിജയ പരമ്പര അവസാനിപ്പിച്ച് സൺറൈസേഴ്സ്. ഇന്ന് 202 എന്ന ടാർഗറ്റ് ചെയ്സ് ചെയ്ത രാജസ്ഥാൻ 200 റൺസ് ആണ് എടുത്തത്. അവസാന പന്തിൽ ജയിക്കാൻ 2 റൺസ് എടുക്കേണ്ടിരുന്ന സമയത്ത് പവൽ എൽ ബി ഡബ്ല്യു ആവുക ആയിരുന്നു. അവസാന 17 പന്തിൽ 21 റൺസ് മാത്രമെ രാജസ്ഥാന് ജയിക്കാൻ വേണ്ടിയുരുന്നുള്ളൂ. എന്നാൽ അത് നേടാൻ അവർക്ക് ആയില്ല.
ഇന്ന് സൺറൈസസിനെതിരെ 202 എന്ന ലക്ഷ്യം പിന്തുടർന്ന് രാജസ്ഥാന് തുടക്കത്തിൽ തന്നെ അവരുടെ ഓപ്പണർ ബട്ലറെയും ക്യാപ്റ്റൻ സഞ്ജു സാംസണയും നഷ്ടപ്പെട്ടിരുന്നു. ഇരുവരും ഡക്കിലാണ് ഇന്ന് പുറത്തായത്. ഇരുവരെയും ആദ്യ ഓവറിൽ ഭുവനേശ്വർ കുമാർ ആണ് പുറത്താക്കിയത്‌. എന്നാൽ ഇതിൽ പതറാതെ യശസ്വി യസ്വാളും റിയാൻ പരാഗും കൂടി ടീമിനെ മുന്നോട്ടേക്ക് നയിച്ചു.
ഇരുവരും റൺറേറ്റ് കുറയാതെ സൂക്ഷിച്ചത് രാജസ്ഥാൻ വലിയ സമ്മർദ്ദത്തിലേക്ക് പോകാതെ അവരെ കാത്തു. ജയസ്വാൾ 30 പന്തിൽ 50 പൂർത്തിയാക്കിയപ്പോൾ, പരാഗ് 31 പന്തിൽ 50 റൺസിൽ എത്തി. 13 ഓവറിൽ 132 എന്ന സ്കോറിൽ രാജസ്ഥാൻ എത്തി. അവർക്ക് അവസാന 7 ഓവറിൽ 70 റൺസായിരുന്നു ജയിക്കാൻ വേണ്ടിയിരുന്നത്.
40 പന്തിൽ 67 റൺസ് എടുത്താണ് ജയ്സ്വാൾ പുറത്തായത്. 2 സിസ്കും 7 ഫോറും ജയ്സ്വാൾ അടിച്ചു. അവസാന 5 ഓവറിൽ 45 റൺസ് ആയിരുന്നു രാജസ്ഥാന് ജയിക്കാൻ വേണ്ടത്. 16ആം ഓവറിൽ പരാഗിനെ കമ്മിൻസ് പുറത്താക്കി. 49 പന്തിൽ നിന്ന് 77 റൺസ് ആണ് പരാഗ് എടുത്തത്. 4 സിക്സും എട്ടു ഫോറും അടിച്ചു.
പവലും ഹെറ്റ്മയറും ആയിരുന്നു ക്രീസിൽ. അവസാന 4 ഓവറിൽ 42 ആയിരുന്നു ടാർഗറ്റ്. ഇത് 3 ഓവറിൽ 27 ആയി കുറഞ്ഞു. 18ആം ഓവറിൽ ഹെറ്റ്മയറിനെ രാജസ്ഥാന് നഷ്ടമായി. അവസാന ഓവറിൽ ജയിക്കാൻ വേണ്ടത് 20 റൺസ്.
കമ്മിൻസ് എറിഞ്ഞ 19ആം ഓവറിലെ ആദ്യ പന്തിൽ ജുറൽ പുറത്ത്. രാജസ്ഥാൻ സമ്മർദ്ദത്തിൽ ആയ നിമിഷം. അശ്വിൻ പവലിനൊപ്പം ചേർന്നു. പവൽ അവസാന പന്തിൽ സിക്സ് അടിച്ചു എങ്കിലും കമ്മിൻസ് ആ ഓവറിൽ നൽകിയത് ആകെ 7 റൺസ്. അവസാന ഓവറിൽ ജയിക്കാൻ 13 റൺസ്.
ഭുവനേശ്വർ ആണ് അവസാന ഓവർ എറിഞ്ഞത്. ആദ്യ പന്തിൽ അശ്വിൻ സിംഗിൾ എടുത്തു. 5 പന്തിൽ 12 റൺസ്. രണ്ടാം പന്തിൽ 2. 4 പന്തിൽ ജയിക്കാൻ 10 റൺസ്. 3ആം പന്തിൽ 4. ജയിക്കാൻ 3 പന്തിൽ 6 റൺസ്. അടുത്ത പന്തിൽ വീണ്ടും 2. ജയിക്കാൻ 2 പന്തിൽ 4 റൺസ്. അഞ്ചാം പന്തിലും 2. ഒരു പന്തിൽ ജയിക്കാൻ 2.
ആവേശകരമായ ഫിനിഷ്. അവസാന പന്തിൽ പവൽ എൽ ബി ഡബ്ല്യു. രാജസ്ഥാൻ റിവ്യൂ ചെയ്തു എങ്കിലും ഔട്ട് തന്നെ ആയിരുന്നു. 1 റണ്ണിന് സൺറൈസേഴ്സ് വിജയം.
ഇന്ന് ആദ്യം ബാറ്റു ചെയ്ത സൺറൈസേഴ്സ് ഹൈദ്രാബാദ് 201 റൺസ് ആയിരുന്നു എടുത്തത്. നിതിഷ് റെഡ്ഡിയും ട്രാവിസ് ഹെഡും അര്‍ദ്ധ ശതകങ്ങള്‍ നേടിയപ്പോള്‍ 19 പന്തിൽ 42 റൺസ് നേടി ക്ലാസ്സനും തിളങ്ങിയപ്പോള്‍ 3 വിക്കറ്റ് നഷ്ടത്തിൽ 201 റൺസാണ് സൺറൈസേഴ്സ് നേടിയത്.
അഭിഷേക് ശര്‍മ്മയെ അവേശ് ഖാനും അന്മോൽപ്രീത് സിംഗിനെ സന്ദീപ് ശര്‍മ്മയും പുറത്താക്കിയപ്പോള്‍ സൺറൈസേഴ്സ് 35/2 എന്ന നിലയിലേക്ക് സൺറൈസേഴ്സ് വീണു. പിന്നീട് സൺറൈസേഴ്സിനെ ട്രാവിസ് ഹെഡും നിതീഷ് റെഡ്ഡിയും മുന്നോട്ട് നയിക്കുകയായിരുന്നു. 37 പന്തിൽ നിന്ന് ട്രാവിസ് ഹെഡ് തന്റെ അര്‍ദ്ധ ശതകം നേടിയത്.
58 റൺസ് നേടിയ ട്രാവിസ് ഹെഡിനെ അവേശ് ഖാന്‍ പുറത്താക്കിയപ്പോള്‍ 96 റൺസിന്റെ മൂന്നാം വിക്കറ്റ് കൂട്ടുകെട്ട് രാജസ്ഥാന് തകര്‍ത്തു. ചഹാലിനെ തുടരെയുള്ള ഓവറുകളിൽ നിതീഷ് റെഡ്ഡി കടന്നാക്രമിച്ചപ്പോള്‍ 15 ഓവറുകള്‍ പിന്നിടുമ്പോള്‍ സൺറൈസേഴ്സ് 131/3 എന്ന നിലയിലായിരുന്നു. 30 പന്തിൽ നിന്ന് നിതീഷ് റെഡ്ഢി തന്റെ അര്‍ദ്ധ ശതകം തികച്ചപ്പോള്‍ അതേ ഓവറിൽ അശ്വിനെ രണ്ട് സിക്സുകള്‍ക്ക് പായിച്ച് താരം റൺറേറ്റ് ഉയര്‍ത്തി.
തന്റെ അവസാന ഓവര്‍ എറിയാനെത്തിയ ചഹാലിനെ ഹെയിന്‍റിച്ച് ക്ലാസ്സന്‍ തുടരെയുള്ള സിക്സുകളോടെ വരവേറ്റപ്പോള്‍ ഓവറിൽ നിന്ന് 16 റൺസാണ് പിറന്നത്. അതിന് മുമ്പ് അശ്വിന്‍ എറിഞ്ഞ ഓവറിൽ നിന്ന് 15 റൺസ് റെഡ്ഡി – ക്ലാസ്സന്‍ കൂട്ടുകെട്ട് നേടിയിരുന്നു.
അവേശ് ഖാന്‍ എറിഞ്ഞ 18ാം ഓവറിൽ നിതീഷ് റെഡ്ഡി ഒരു ഫോറും ഒരു സിക്സും നേടിയപ്പോള്‍ ഓവറിൽ നിന്ന് 12 റൺസ് വന്നു. അവേശ് ഖാന്‍ തന്റെ നാലോവറിൽ 39 റൺസ് വഴങ്ങി രണ്ട് വിക്കറ്റ് നേടുകയായിരുന്നു. 19ാം ഓവറിൽ രണ്ട് ബൗണ്ടറിയുമായി ക്ലാസ്സനും റൺ റേറ്റ് ഉയര്‍ത്തിയപ്പോള്‍ ബോള്‍ട്ടിന്റെ ഓവറിൽ നിന്ന് 12 റൺസ് വന്നു.
32 പന്തിൽ 70 റൺസാണ് നിതീഷ് റെഡ്ഡി – ക്ലാസ്സന്‍ കൂട്ടുകെട്ട് നേടിയത്. റെഡ്ഡി 42 പന്തിൽ 76 റൺസുമായി പുറത്താകാതെ നിന്നപ്പോള്‍ അവസാന ഓവറുകളിൽ ക്ലാസ്സന്‍ താണ്ഡവമാടുകയായിരുന്നു. അവസാന 5 ഓവറിൽ 70 റൺസാണ് സൺറൈസേഴ്സ് നേടിയത്.
