കൗണ്ടി ചാമ്പ്യന്‍ഷിപ്പ് കളിക്കുന്നതിന് മുന്‍ഗണന നല്‍കുന്നതിനായി ഐപിഎല്‍ കളിക്കേണ്ടതില്ലെന്ന് തീരുമാനിച്ച് ലങ്കാഷയര്‍ താരം ലിയാം ലിവിംഗ്സ്റ്റണ്‍. കഴിഞ്ഞ സീസണില്‍ രാജസ്ഥാന്‍ റോയല്‍സിന് വേണ്ടി കളിച്ച താരത്തെ ഇത്തവണ ഫ്രാഞ്ചൈസി റിലീസ് ചെയ്തിരുന്നു. അതിന് പകരം ഡിവിഷന്‍ വണ്‍ കൗണ്ടി സീസണ്‍ പൂര്‍ണ്ണമായും കളിച്ച് ഇംഗ്ലണ്ട് ടെസ്റ്റ് ടീമില്‍ ഇടം പിടിക്കാനാണ് താരം ശ്രമിക്കുന്നത്.
കഴിഞ്ഞ സീസണില്‍ അടിസ്ഥാന വിലയായ 50 ലക്ഷത്തിനാണ് താരത്തെ രാജസ്ഥാന്‍ സ്വന്തമാക്കിയത്. നാല് മത്സരങ്ങളില്‍ നിന്ന് 71 റണ്‍സ് നേടിയ താരത്തിന്റെ ഏറ്റവും മികച്ച പ്രകടനം 26 പന്തില്‍ സണ്‍റൈസേഴ്സിനെതിരെ 44 റണ്‍സ് നേടിയതായിരുന്നു.
