മഴ വില്ലനായി മാറുമോയെന്ന ഭീതി മെല്‍ബേണിലെ അഞ്ചാം ദിവസം പടര്‍ന്നുവെങ്കിലും ശേഷിക്കുന്ന 2 വിക്കറ്റുകളും മഴ മാറിയ നിമിഷത്തില്‍ ക്ഷണനേരത്തില്‍ വീഴ്ത്തി മെല്‍ബേണില്‍ ചരിത്രം കുറിച്ച് ഇന്ത്യ. പാറ്റ് കമ്മിന്‍സ് തീര്‍ത്ത പ്രതിരോധത്തെയും മഴ ഭീഷണിയെയും മറികടന്ന് വിജയം സ്വന്തമാക്കിയതോടെ ഇന്ത്യ പരമ്പരയില്‍ മുന്നിലെത്തി. അവസാന ടെസ്റ്റിനായി സിഡ്നിയിലേക്ക് ടീമുകള്‍ യാത്രയാകുമ്പോള്‍ ഇന്ത്യയ്ക്ക് 2-1 എന്ന ലീഡാണ് പരമ്പരയിലുള്ളത്.
63 റണ്‍സ് നേടിയ പാറ്റ് കമ്മിന്‍സിനെയും പുറത്താക്കിയത് ജസ്പ്രീത് ബുംറയായിരുന്നു. ബുംറയുടെ മൂന്നാം വിക്കറ്റാണ് ഇന്നിംഗ്സിലേത്. 261 റണ്‍സിനു ഓസ്ട്രേലിയ ഓള്‍ഔട്ട് ആയപ്പോള്‍ ഇന്ത്യ മത്സരം 137 റണ്‍സിനു വിജയിക്കുകയായിരുന്നു. അവസാന വിക്കറ്റായ നഥാന്‍ ലയണിനെ ഇഷാന്ത് ശര്‍മ്മയാണ് വീഴ്ത്തിയത്.
