ലോര്‍ഡ്സ് ടെസ്റ്റിൽ കരുതലോടെ ഓസ്ട്രേലിയ കുതിയ്ക്കുന്നു. ലഞ്ചിന് ശേഷം ഡേവിഡ് വാര്‍ണറെ ഓസ്ട്രേലിയയ്ക്ക് നഷ്ടമായപ്പോള്‍ പിന്നീട് മൂന്നാം വിക്കറ്റിൽ 94 റൺസുമായി സ്റ്റീവന്‍ സ്മിത്ത് – മാര്‍നസ് ലാബൂഷാനെ കൂട്ടുകെട്ടാണ് ഓസ്ട്രേലിയയെ മുന്നോട്ട് നയിച്ചത്. രണ്ടാം സെഷന്‍ അവസാനിക്കുമ്പോള്‍ ഓസ്ട്രേലിയ 190/2 എന്ന നിലയിലാണ്. ജോഷ് ടംഗ് ആണ് വാര്‍ണറെ പുറത്താക്കിയത്.
വാര്‍ണര്‍ 66 റൺസ് നേടി പുറത്താകുമ്പോള്‍ ഓസ്ട്രേലിയ 96/2 എന്ന നിലയിലായിരുന്നു. പിന്നീട് 94 റൺസാണ് മൂന്നാം വിക്കറ്റ് കൂട്ടുകെട്ടിൽ ഓസ്ട്രേലിയ നേടിയത്. ചായയ്ക്കായി പിരിയുമ്പോള്‍ മാര്‍നസ് ലാബൂഷാനെ 45 റൺസും സ്റ്റീവന്‍ സ്മിത്ത് 38 റൺസും നേടിയാണ് ക്രീസിലുള്ളത്.
