മുഹമ്മദ് അമീറിനെതിരെ ആരോപണങ്ങളുമായി ഷൊയ്ബ് അക്തര്‍. 2010ലെ സ്പോട്ട് ഫിക്സിംസിന് ശേഷം വിലക്ക് കഴിഞ്ഞ് അടുത്തിടെ ക്രിക്കറ്റിലേക്ക് മടങ്ങിയെത്തിയ അമീര്‍ ഓസ്ട്രേലിയന്‍ പര്യടനത്തിന് തൊട്ടുമുമ്പ് ടെസ്റ്റ് ക്രിക്കറ്റില്‍ നിന്ന് വിരമിച്ച് ഏകദിനത്തിലും ടി20യിലും മാത്രം ശ്രദ്ധ കേന്ദ്രീകരിക്കുവാന്‍ തീരുമാനിച്ചിരുന്നു. ഇതിനെതിരെ പല മുന്‍ താരങ്ങളും വിമര്‍ശനം ഉയര്‍ത്തിയിരുന്നു.
ഇപ്പോള്‍ ഷൊയ്ബ് അക്തറും താരത്തെ വിമര്‍ശിക്കുകയാണുണ്ടായത്. അന്താരാഷ്ട്ര ക്രിക്കറ്റിലേക്ക് താരത്തെ തിരികെ കൊണ്ടുവരുവാന്‍ ശ്രമിച്ച ബോര്‍ഡിനോടും രാജ്യത്തോടും മുഖം തിരിച്ച് താരം ചതിച്ചുവന്നാണ് അക്തര്‍ ആരോപിച്ചത്. രാജ്യത്തിന് തന്റെ സേവനങ്ങള്‍ അമീര്‍ നിഷേധിക്കുകയാണെന്നും ഇത് കൊടുംചതിയായി കണക്കാക്കേണ്ടതാണെന്നും അക്തര്‍ പറഞ്ഞു.
മുഹമ്മദ് അമീറിനെ തിരികെ കൊണ്ടുവരുവാന്‍ മറ്റു താരങ്ങള്‍ക്കില്ലാത്ത പരിഗണനയാണ് ബോര്‍ഡ് നല്‍കിയത്. എന്നിട്ട് എന്താണ് ഫലം ലഭിച്ചത്, ടെസ്റ്റ് ക്രിക്കറ്റ് കളിക്കാന്‍ താനില്ലെന്ന് പറഞ്ഞ് താരം പുറകില്‍ നിന്ന് കുത്തുകയായിരുന്നുവെന്നും അക്തര്‍ അഭിപ്രായപ്പെട്ടു.
