ഓൾ കേരള സെലസ്റ്റിയൽ ട്രോഫി: ട്രൈഡന്റ് ക്രിക്കറ്റ് അക്കാദമിക്ക് തുടർച്ചയായ നാലാം വിജയം, ക്വാർട്ടർ പ്രവേശനം

തകർപ്പൻ പ്രകടനം തുടരുന്ന തൃശൂർ ട്രൈഡന്റ് ക്രിക്കറ്റ് അക്കാദമിക്ക് തുടർച്ചയായ നാലാം വിജയം. നോക്കൗട്ട് ഘട്ടത്തിൽ നടന്ന ആവേശകരമായ പോരാട്ടത്തിൽ സസക്സ് ക്രിക്കറ്റ് ക്ലബ് കോഴിക്കോടിനെ 8 വിക്കറ്റിനാണ് ട്രൈഡന്റ് പരാജയപ്പെടുത്തിയത്. കൃത്യതയാർന്ന ബൗളിംഗിലൂടെ സസക്സിനെ ചെറിയ സ്കോറിൽ ഒതുക്കിയ കിരൺ സാഗർ ഈ ടൂർണമെന്റിലെ തന്റെ മൂന്നാമത്തെ ‘മാൻ ഓഫ് ദി മാച്ച്’ പുരസ്കാരവും സ്വന്തമാക്കി.

ടോസ് നേടി ബാറ്റിംഗ് തിരഞ്ഞെടുത്ത സസക്സ് കോഴിക്കോടിന് തുടക്കം മുതലേ പിഴച്ചു. ട്രൈഡന്റ് ബൗളർമാരുടെ കൃത്യതയാർന്ന പന്തുകൾക്ക് മുന്നിൽ പതറിയ സസക്സ് 22.1 ഓവറിൽ 127 റൺസിന് എല്ലാവരും പുറത്തായി.
അനിരുദ്ധ് ശിവം (31), ആനന്ദു (25), വി. പ്രകാശ് (24) എന്നിവർ മാത്രമാണ് അൽപ്പമെങ്കിലും ചെറുത്തുനിന്നത്.
ട്രൈഡന്റിന് വേണ്ടി കിരൺ സാഗർ 5.1 ഓവറിൽ വെറും 14 റൺസ് മാത്രം വഴങ്ങി 4 വിക്കറ്റുകൾ വീഴ്ത്തി സസക്സിന്റെ നട്ടെല്ലൊടിച്ചു. അതുൽ സഞ്ജയ് 3 വിക്കറ്റും ആദർശ് ഒരു വിക്കറ്റും നേടി.
128 റൺസ് എന്ന വിജയലക്ഷ്യം പിന്തുടർന്ന ട്രൈഡന്റ് ക്രിക്കറ്റ് അക്കാദമി വെറും 11.2 ഓവറിൽ 2 വിക്കറ്റ് മാത്രം നഷ്ടപ്പെടുത്തി ലക്ഷ്യം കണ്ടു.
ഓപ്പണർ ജോ ഫ്രാൻസിസിന്റെ വെടിക്കെട്ട് ബാറ്റിംഗാണ് വിജയം അനായാസമാക്കിയത്. വെറും 34 പന്തിൽ 10 ഫോറുകളും 3 സിക്സറുകളും സഹിതം 67 റൺസാണ് ജോ അടിച്ചുകൂട്ടിയത്. അശ്വിൻ ആനന്ദ് (39 റൺസ്) മികച്ച പിന്തുണ നൽകി.
തുടർച്ചയായ നാലാം വിജയത്തോടെ ട്രൈഡന്റ് അക്കാദമി ടൂർണമെന്റിൽ ആദ്യ ഘട്ട ക്വാർട്ടർ ഫൈനലിൽ എത്തി.