29-ാമത് ഓൾ കേരള സെലസ്റ്റിയൽ ട്രോഫി ക്രിക്കറ്റ് ടൂർണമെന്റിൽ തകർപ്പൻ ജയവുമായി ലിറ്റിൽ മാസ്റ്റേഴ്സ് ക്രിക്കറ്റ് ക്ലബ്ബ് ആദ്യ ഘട്ട സെമിയിൽ
ആവേശകരമായ പോരാട്ടത്തിൽ ട്രാവൻകൂർ ക്രിക്കറ്റിംഗ് യൂണിയനെ (TCU) 21 റൺസിനാണ് ലിറ്റിൽ മാസ്റ്റേഴ്സ് കീഴടക്കിയത്. അഞ്ച് വിക്കറ്റ് പ്രകടനവുമായി കളം നിറഞ്ഞ വിനയ് വി. വർഗീസാണ് ലിറ്റിൽ മാസ്റ്റേഴ്സിന്റെ വിജയശില്പി.
ടോസ് നേടി ബാറ്റിംഗ് തിരഞ്ഞെടുത്ത ലിറ്റിൽ മാസ്റ്റേഴ്സ് സി.സിക്ക് നിശ്ചിത ഇടവേളകളിൽ വിക്കറ്റുകൾ നഷ്ടമായെങ്കിലും രോഹൻ നായരുടെ (41) പോരാട്ടം മാന്യമായ സ്കോറിലെത്തിച്ചു. 26.1 ഓവറിൽ 156 റൺസിന് ടീം പുറത്തായി. ഹെർമിഷെസ് (25), ആദിത്യ മോഹൻ (22) എന്നിവരും ഭേദപ്പെട്ട പ്രകടനം കാഴ്ചവെച്ചു. ട്രാവൻകൂറിന് വേണ്ടി ഡി. ജോൺസൺ നാല് വിക്കറ്റുകൾ വീഴ്ത്തി തിളങ്ങി. ബി. വിശ്വജിത്ത് മൂന്ന് വിക്കറ്റുകൾ നേടി.
157 റൺസ് വിജയലക്ഷ്യവുമായി മറുപടി ബാറ്റിംഗിനിറങ്ങിയ ട്രാവൻകൂറിന് വേണ്ടി എം. എം. അഖിലും (49) എം. അഭയും (33) മികച്ച തുടക്കമാണ് നൽകിയത്. ഒരു ഘട്ടത്തിൽ ട്രാവൻകൂർ വിജയത്തിലേക്ക് നീങ്ങുമെന്ന് കരുതിയെങ്കിലും വിനയ് വർഗീസിന്റെ പന്തുകൾ കളി മാറ്റിമറിച്ചു. വെറും 19 റൺസ് വഴങ്ങി വിനയ് അഞ്ച് വിക്കറ്റുകൾ പിഴുതതോടെ ട്രാവൻകൂറിന്റെ ബാറ്റിംഗ് നിര ചീട്ടുകൊട്ടാരം പോലെ തകർന്നു. ആദിത്യ മോഹൻ (3 വിക്കറ്റ്) മികച്ച പിന്തുണ നൽകി. 25.4 ഓവറിൽ 135 റൺസിന് എല്ലാവരും പുറത്തായതോടെ ലിറ്റിൽ മാസ്റ്റേഴ്സ് വിജയം ഉറപ്പിച്ചു.
ചുരുക്കത്തിൽ:
ലിറ്റിൽ മാസ്റ്റേഴ്സ് സി.സി: 156/10 (26.1 ഓവർ) – രോഹൻ നായർ 41, ഹെർമിഷെസ് 25. (ഡി. ജോൺസൺ 4/43).
ട്രാവൻകൂർ ക്രിക്കറ്റിംഗ് യൂണിയൻ: 135/10 (25.4 ഓവർ) – എം. എം. അഖിൽ 49, എം. അഭയ് 33. (വിനയ് വർഗീസ് 5/19, ആദിത്യ മോഹൻ 3/22).
മാൻ ഓഫ് ദി മാച്ച്: വിനയ് വി. വർഗീസ്