കേരള ബ്ലാസ്റ്റേഴ്സിൻ്റെ സെപ്റ്റംബറിലെ മികച്ച കളിക്കാരനായി നോഹ സദൗയി തിരഞ്ഞെടുക്കപ്പെട്ടു
പിച്ചിലെ മിന്നുന്ന പ്രകടനത്തിന് പിന്നാലെ, സെപ്റ്റംബറിലെ കേരള ബ്ലാസ്റ്റേഴ്സിൻ്റെ ഫാൻസ് പ്ലെയർ ഓഫ് ദി മന്ത് ആയി നോഹ സദൗയി തിരഞ്ഞെടുക്കപ്പെട്ടു. ഈ സീസണിൽ വെറും 8 മത്സരങ്ങളിൽ നിന്ന് 9 ഗോളുകളും 3 അസിസ്റ്റുകളും നേടിയ മൊറോക്കൻ ഫോർവേഡ് അസാധാരണ ഫോമിലാണ്. സദൗയി അഞ്ച് പ്ലെയർ ഓഫ് ദി മാച്ച് അവാർഡുകളും ഡുറാൻഡ് കപ്പ് ഗോൾഡൻ ബൂട്ടും ഇതുവരെ ബ്ലാസ്റ്റേഴ്സിനായി സ്വന്തമാക്കി.
അദ്ദേഹത്തിൻ്റെ സ്ഥിരതയാർന്ന ഗോൾ സ്കോറിംഗും പ്ലേ മേക്കിംഗ് കഴിവുകളും ബ്ലാസ്റ്റേഴ്സിൻ്റെ ഇതുവരെയുള്ള പ്രകടനങ്ങളിൽ നിർണായകമാണ്. ഗോവയിൽ നിന്ന് ബ്ലാസ്റ്റേഴ്സിൽ എത്തിയ നോഹ പെട്ടെന്ന് ടീമിലെ ഏറ്റവും പ്രധാനപ്പെട്ട കളിക്കാരിൽ ഒരാളായി. സെപ്റ്റംബറിൽ മാത്രം 4 മത്സരങ്ങളിൽ നിന്ന് 3 ഗോളുകൾ അദ്ദേഹം നേടി.