കേരളത്തെ കിരീടത്തിലേക്ക് നയിച്ച ജിജോ ജോസഫ് ഇനി ഐ എസ് എല്ലിൽ കളിക്കും | Jijo Joseph To Indian Super League

കേരളത്തിന് ഏഴാം സന്തോഷ് ട്രോഫി കിരീടം നേടിക്കൊടുത്ത കേരള ക്യാപ്റ്റൻ ജിജോ ജോസഫ് ഇനി ഐ എസ് എല്ലിൽ കളിക്കും. ജിജോ ജോസഫിനെ ഐ എസ് എൽ ക്ലബായ ഈസ്റ്റ് ബംഗാൾ ആണ് സ്വന്തമാക്കിയിരുന്നത്. സന്തോഷ് ട്രോഫിയിൽ തിളങ്ങിയ സമയത്ത് തന്നെ തനിക്ക് ഐ എസ് എല്ലിൽ കളിക്കാൻ വലിയ ആഗ്രഹം ഉണ്ട് എന്ന് ജിജോ ജോസഫ് പറഞ്ഞിരുന്നു. ആ ആഗ്രഹം ആണ് ഇപ്പോൾ സത്യമാകുന്നത്.

ജിജോയെ ഐ എസ് എല്ലിൽ കളിക്കാൻ എസ് ബി ഐ വിടും. എസ് ബി ഐ ജീവനക്കാരനാണ് ജിജോ ജോസഫ്. ഒരു വർഷത്തെ കരാറിലാകും കേരളത്തിന്റെ ക്യാപ്റ്റൻ കൊൽക്കത്തയിലേക്ക് പോകുന്നത്. ജിജോയുടെ ആദ്യ ഐ എസ് എൽ ക്ലബും ആകും ഈസ്റ്റ് ബംഗാൾ.

കേരളത്തിനായി ഏഴ് തവണ സന്തോഷ് ട്രോഫി കളിച്ച താരമാണ് ജിജോ ജോസഫ്. മലപ്പുറം ജില്ലയിൽ നടന്ന ഇത്തവണത്തെ ടൂർണമെന്റിൽ ഒരു ഹാട്രിക്ക് അടക്കം അഞ്ചു ഗോളുകൾ അദ്ദേഹം നേടിയിരുന്നു. കഴിഞ്ഞ സീസൺ കെ പി എല്ലിൽ കെ എസ് ഇ ബിക്കായി ഗസ്റ്റ് കളിച്ചും ജിജോ തിളങ്ങിയിരുന്നു.