ആവേശകരം, കൊൽക്കത്ത ഡർബി സമനിലയിൽ അവസാനിച്ചു

ആവേശകരമായ കൊൽക്കത്തൻ ഡർബി സമനിലയിൽ അവസാനിച്ചു. അടിയും തിരിച്ചടിയും കണ്ട മത്സരത്തിൽ മോഹൻ ബഗാനും ഈസ്റ്റ് ബംഗാളും 2-2 എന്ന സമനിലയിൽ പിരിഞ്ഞു. വിജയ ഗോൾ വന്നില്ല എങ്കിലും തീർത്തും ഒരു എന്റർടെയ്നർ ആണ് ഇന്ന് സാൾട്ട്ലേക്കിൽ അരങ്ങേറിയത്. ഇന്ന് മത്സരത്തിന്റെ മൂന്നാം മിനുട്ടിൽ യുവതാരം അജയ് ഛേത്രിയിലൂടെ ഈസ്റ്റ് ബംഗാൾ ആണ് ലീഡ് എടുത്തത്.

17ആം മിനുട്ടിൽ അർമാന്ദോ സദികുവിലൂടെ മോഹൻ ബഗാൻ സമനില പിടിച്ചു. ആദ്യ പകുതി 1-1 എന്ന നിലയിൽ അവസാനിച്ചു. രണ്ടാം പകുതിയിൽ 53ആം മിനുട്ടിൽ ഒരു പെനാൾട്ടിയിലൂടെ ഈസ്റ്റ് ബംഗാൾ വീണ്ടും ലീഡ് എടുത്തു. ക്ലൈറ്റൻ സിൽവ ആണ് പെനാൾട്ടി ലക്ഷ്യത്തിൽ എത്തിച്ചത്.

തുടർച്ചയായി അറ്റാക്കുകൾ നടത്തി മോഹൻ ബഗാൻ കളിയിലേക്ക് തിരികെവരാൻ ശ്രമിച്ചു. 88ആം മിനുട്ടിൽ സഹൽ അബ്ദുൽ സമദിന്റെ ഒരു ക്രോസ് പെട്രാറ്റോസിന്റെ കാലിലേക്ക് എത്തി. അദ്ദേഹം മോഹൻ ബഗാന് സമനില നൽകി. സ്കോർ 2-2.

ഈ ഫലത്തോടെ മോഹൻ ബഗാൻ 20 പോയിന്റുമായി അഞ്ചാം സ്ഥാനത്ത് നിൽക്കുന്നു. ഈസ്റ്റ് ബംഗാൾ 12 പോയിന്റുമായി ഏഴാം സ്ഥാനത്തും നിൽക്കുന്നു.