ചാമ്പ്യൻസ് ലീഗ് മത്സരത്തിൽ തന്റെ ഇപ്പോഴത്തെ ക്ലബായ യുവന്റസിന് എതിരെ റൊണാൾഡോ നേടിയ ഓവർ ഹെഡ് കിക്ക്‌ ഗോൾ യുവേഫയുടെ സീസണിലെ ഏറ്റവും മികച്ച ഗോളായി തിരഞ്ഞെടുത്തു. ചാമ്പ്യൻസ് ലീഗിന്റെ ക്വാർട്ടർ ഫൈനലിൽ മത്സരത്തിലായിരുന്നു ഈ ഗോൾ പിറന്നത്. ബാക്കിയുള്ള 10 മത്സരാർത്ഥികൾക്ക് ലഭിച്ച മൊത്തം വോട്ടിനേക്കാൾ കൂടുതൽ വോട്ട് നേടിയാണ് റൊണാൾഡോ വിജയിയായത്. അന്ന് യുവന്റസിനെതിരെയുള്ള ഗോളിന് യുവന്റസ് ആരാധകർ വരെ എഴുന്നേറ്റു നിന്ന് കൈ അടിച്ചിരുന്നു.
മൊത്തം 346915 വോട്ടുകൾ രേഖപെടുത്തിയതിൽ നിന്നും 197496 വോട്ടുകൾ നേടിയാണ് റൊണാൾഡോ വിജയിയായത്. മഴ്സെ താരം ദിമിത്രി പയേറ്റിന്റെ ഗോളാണ് രണ്ടാം സ്ഥാനത്ത് എത്തിയത്. യുവേഫ യൂറോപ്പ ലീഗിൽ ആർ.ബി ലെയ്പ്സിഗിനെതിരെയായിരുന്നു പയേറ്റിന്റെ ഗോൾ. 35 558 വോട്ടുകളാണ് പയേറ്റിന് ലഭിച്ചത്. മുൻ വർഷങ്ങളിൽ മൻസുകിച്ചും ലിയോണൽ മെസ്സിയുമാണ് മികച്ച ഗോളിനുള്ള അവാർഡ് നേടിയത്.
