വീണ്ടും സൗദിയിലെ മികച്ച താരത്തിനുള്ള പുരസ്കാരം റൊണാൾഡോക്ക്

സൗദി പ്രൊ ലീഗിലെ മികച്ച താരത്തിനുള്ള പുരസ്കാരം ക്രിസ്റ്റ്യാനോ റൊണാൾഡോ വീണ്ടും സ്വന്തമാക്കി. സെപ്റ്റംബർ മാസത്തിലെ മികച്ച താരമായാണ് റൊണാൾഡോ തിരഞ്ഞെടുക്കപ്പെട്ടത്. സെപ്റ്റംബർ മാസത്തിൽ റൊണാൾഡോ അഞ്ചു ഗോളുകൾ സ്കോർ ചെയ്തിരുന്നു. ഈ സീസണിൽ ഇതുവരെ സൗദി ലീഗിൽ 10 ഗോളുകൾ നേടി അവിടെ ടോപ് സ്കോറർ ആണ് റൊണാൾഡോ.

ഓഗസ്റ്റ് മാസത്തിലും റൊണാൾഡോ ഈ പുരസ്കാരം നേടിയിരുന്നു. റൊണാൾഡോ സൗദിയിൽ എത്തിയ ശേഷം ഇത് മൂന്നാം തവണയാണ് ഈ പുരസ്കാരം നേടുന്നത്. അൽ നാസറിന്റെ പരിശീലകൻ ലുയിസ് കാസ്ട്രോ മികച്ച പരിശീലകനായും മാറി. സെപ്റ്റംബർ മാസത്തിലെ എല്ലാ മത്സരങ്ങളും അൽ നാസർ വിജയിച്ചിരുന്നു. ഇത്തിഹാദിന്റെ ഗോൾ കീപ്പർ മാർസെലോ ഗ്രോഹോ മികച്ച ഗോൾ കീപ്പർ ആയും തിരഞ്ഞെടുക്കപ്പെട്ടു.