പ്രീമിയർ ലീഗിൽ ഫ്രാങ്ക് ലമ്പാർഡിന്റെ എവർട്ടണിനെ എതിരില്ലാത്ത രണ്ടു ഗോളിന് വീഴ്ത്തി തങ്ങളുടെ സമീപകാലത്തെ മികവ് തുടർന്ന് സൗതാപ്റ്റൺ. സ്വന്തം മൈതാനത്ത് 58 ശതമാനം പന്ത് കൈവശം വച്ച സെയിന്റ്സ് ആണ് മത്സരത്തിൽ അവസരങ്ങൾ എല്ലാം തുറന്നത്. 18 ഷോട്ടുകൾ ഉതിർത്ത അവരുടെ ശ്രമങ്ങൾ രണ്ടു തവണ പോസ്റ്റിൽ തട്ടി മടങ്ങുകയും ചെയ്തു.
രണ്ടാം പകുതിയിൽ 52 മത്തെ മിനിറ്റിൽ ചെ ആദംസിന്റെ പാസിൽ നിന്നു അതുഗ്രൻ ഷോട്ടിലൂടെ സ്റ്റുവർട്ട് ആംസ്ട്രോങ് ആണ് സെയിന്റ്സിനെ മത്സരത്തിൽ മുന്നിലെത്തിച്ചത്. മത്സരത്തിൽ സെയിന്റ്സിനെ എവർട്ടൺ അധികമൊന്നും ബുദ്ധിമുട്ടിച്ചില്ല. 84 മത്തെ മിനിറ്റിൽ ഹെഡറിലൂടെ ഗോൾ കണ്ടത്തിയ ഷെയിൻ ലോങ് സൗതാപ്റ്റൺ ജയം ഉറപ്പിക്കുക ആയിരുന്നു. ജയത്തോടെ സൗതാപ്റ്റൺ പത്താം സ്ഥാനത്ത് എത്തിയപ്പോൾ തരം താഴ്ത്തൽ ഭീഷണി നേരിടുന്ന എവർട്ടൺ ലീഗിൽ പതിനാറാം സ്ഥാനത്ത് ആണ്.
