ചെൽസിയെ ഞെട്ടിച്ച് റിലഗേഷൻ സോണിൽ ഉള്ള നോട്ടിങ്ഹാം ഫോറസ്റ്റ്. ഇന്ന് ഇംഗ്ലീഷ് പ്രീമിയർ ലീഗിൽ ഫോറസ്റ്റിന്റെ ഹോം ഗ്രൗണ്ടിൽ നടന്ന മത്സരത്തിൽ ചെൽസിയെ 1-1ന്റെ സമനിലയിൽ പിടിക്കാൻ ഫോറസ്റ്റിന് ആയി. ചെൽസിയുടെ ടോപ് 4 പ്രതീക്ഷികൾക്ക് വലിയ തിരിച്ചടിയാണ് ഈ സമനില.
ഇന്ന് ആദ്യ പകുതിയിൽ 16ആം മിനുട്ടിൽ തന്നെ ചെൽസി ലീഡ് എടുത്തിരുന്നു. ഇടതു വിങ്ങിൽ നിന്ന് പുലിസിക് കൊടുത്ത ക്രോസ് ഹവേർട്സ് ഒരു ഫ്ലിക്കിലൂടെ ലക്ഷ്യത്തിൽ എത്തിക്കാൻ നോക്കി. ഹവേർട്സിന് ഗോൾ നേടാൻ ആയില്ല എങ്കിലും ആ ബോൾ എത്തിയത് സ്റ്റെർലിംഗിന്റെ കാലിൽ. ഒഴിഞ്ഞ് പോസ്റ്റിലേക്ക് പന്ത് എത്തിച്ച് സ്റ്റെർലിംഗ് ഗോൾ ആഘോഷിച്ചു.
രണ്ടാം പകുതിയിൽ ആയിരുന്നു ഫോറസ്റ്റിന്റെ മറുപടി. 65ആം മിനുട്ടിൽ ഒരു ആക്രൊബാറ്റിക് ഫിനിഷിലൂടെ സെർഹ് ഒറിയെ ആണ് ഫോറസ്റ്റിന് സമനില നൽകിയത്. ഒറിയെയുടെ ഫോറസ്റ്റ് ജേഴ്സിയിലെ ആദ്യ ഗോളായിരുന്നു ഇത്.
ഈ സമനില ചെൽസിയെ 25 പോയിന്റുമായി എട്ടാം സ്ഥാനത്ത് നിർത്തുകയാണ്. 14 പോയിന്റുള്ള ഫോറസ്റ്റ് 18ആം സ്ഥാനത്താണ്.
