സീസണിലെ ആദ്യ അന്താരാഷ്ട്ര മത്സരങ്ങൾക്ക് ശേഷമുള്ള പരിശീലനത്തിൽ ആഴ്‌സണലിനെ തേടി നല്ല വാർത്തകൾ എത്തുന്നു. പരിക്കിൽ നിന്നും മോചിതർ ആയ ഹെക്ടർ ബെല്ലരിൻ, കിരേൻ ടിയേർനി, എമിലി സ്മിത്ത് റോ, റോബ് ഹോൾഡിങ് എന്നിവർക്ക് പുറമെ മെസ്യൂട്ട് ഓസിൽ കൂടി ഇന്ന് ആദ്യ ടീമിന് ഒപ്പം പരിശീലനത്തിന് ഇറങ്ങിയത് ആഴ്‌സണലിന് വലിയ ഊർജം ആണ് പകരുക. അസുഖം മാറിയ ശേഷം ഓസിൽ തിരിച്ചു വരുന്നത് ആഴ്‌സണലിന് വലിയ കരുത്ത് പകരും. ഒപ്പം യുവ പ്രതിരോധ താരം ഹോൾഡിങ് കളത്തിലേക്ക് ഉടൻ മടങ്ങി എത്തിയേക്കും എന്നതും ആഴ്‌സണലിന് വളരെ നല്ല വാർത്തയാണ്.
അതേസമയം നീണ്ട നാളത്തെ പരിക്കിന് ശേഷം ആദ്യമായാണ് ആഴ്സണൽ വലത് ബാക്ക് ആയ ഹെക്ടർ ബെല്ലരിൻ പരിശീലനത്തിനു ഇറങ്ങിയത്. മാസങ്ങൾ നീണ്ട വിശ്രമശേഷം ബെല്ലരിൻ കളത്തിൽ തിരിച്ചു വരാൻ കാത്തിരിക്കുന്ന ആരാധകർക്ക് ഇത് വലിയ ആവേശം ആണ് പകരുക. അതോടൊപ്പം ഈ സീസണിൽ സ്‌കോട്ടിഷ് ജേതാക്കൾ കെൽറ്റിക്കിൽ ടീമിലെത്തിയ ഇടത് ബാക്ക് ആയ കിരേൻ ടിയേർനിയും ആദ്യമായി ആഴ്സണൽ ആദ്യ ടീമിനൊപ്പം പരിശീലനത്തിനു ഇറങ്ങി. ടീമിൽ എത്തുമ്പോൾ പരിക്കിൽ ആയിരുന്ന ടിയേർനിയുടെ അരങ്ങേറ്റത്തിനായി ആവേശത്തോടെ കാത്തിരിക്കുകയാണ് ആരാധകർ. അതേസമയം പരിക്കിൽ നിന്ന് മോചിതനായ യുവതാരം എമിലി സ്മിത്ത് റോയുടെ മടങ്ങി വരവും ആഴ്‌സണലിന് വളരെ നല്ല വാർത്തയാണ്.
