പിഎസ്ജിയെ ചാമ്പ്യൻസ് ലീഗ് കിരീട നേട്ടത്തിൽ അഭിനന്ദനങ്ങൾ അർപ്പിച്ച് എംബാപ്പെ

മ്യൂണിക്കിൽ ശനിയാഴ്ച, മെയ് 31 ന് നടന്ന യുവേഫ ചാമ്പ്യൻസ് ലീഗ് ഫൈനലിൽ ഇന്റർ മിലാനെ 5-0 ന് തകർത്തുകൊണ്ട് പാരീസ് സെന്റ് ജെർമെയ്ൻ യൂറോപ്യൻ കിരീടത്തിനായുള്ള തങ്ങളുടെ നീണ്ട കാത്തിരിപ്പിന് ഒടുവിൽ വിരാമമിട്ടു. ഈ ആധികാരിക വിജയം പിഎസ്ജിക്ക് അവരുടെ ആദ്യ യുസിഎൽ കിരീടം സമ്മാനിക്കുക മാത്രമല്ല, ടൂർണമെന്റ് ഫൈനലിൽ രേഖപ്പെടുത്തിയ ഏറ്റവും വലിയ വിജയ മാർജിൻ കൂടിയായി ഇത് മാറി.

രണ്ട് ഗോളുകളും ഒരു അസിസ്റ്റുമായി ഡെസിറെ ഡൂയെയാണ് മത്സരത്തിലെ താരം. 2024-25 സീസണിന്റെ തുടക്കത്തിൽ റയൽ മാഡ്രിഡിലേക്ക് പോയ പിഎസ്ജിയുടെ മുൻ ഇതിഹാസ താരം കിലിയൻ എംബാപ്പെ പി എസ് ജിയെ ഈ വിജയത്തിൽ അഭിനന്ദിച്ചു.

എംബാപ്പെ ഫ്രഞ്ചിൽ തന്റെ ഇൻസ്റ്റാഗ്രാം സ്റ്റോറിയിൽ ഇങ്ങനെ എഴുതി:
“Le grand jour est enfin arrivé. La victoire et avec la manière de tout un club. Félicitations PSG.”
(ഒടുവിൽ ആ വലിയ ദിവസം വന്നെത്തി. ഒരു ക്ലബ് എന്ന നിലയിൽ ഗംഭീരമായ വിജയം. അഭിനന്ദനങ്ങൾ പിഎസ്ജി.)

പിഎസ്ജിയിൽ കളിജീവിതം അവസാനിപ്പിച്ച് മ്യൂണിക്കിലെ ഫൈനലിൽ സന്നിഹിതനായിരുന്ന ഡേവിഡ് ബെക്കാമും തന്റെ ആവേശം പങ്കുവെച്ചു:
“History made. Congratulations @PSG WOW what an incredible game.”