പ്രീസീസൺ; മാഞ്ചസ്റ്റർ യുണൈറ്റഡിന് എവർട്ടണെതിരെ സമനില

മാഞ്ചസ്റ്റർ യുണൈറ്റഡും എവർട്ടണും തമ്മിലുള്ള പ്രീമിയർ ലീഗ് സമ്മർ സീരീസ് മത്സരം 2-2 സമനിലയിൽ അവസാനിച്ചു. ആവേശം നിറഞ്ഞ പോരാട്ടത്തിൽ ഇരു ടീമുകളും ഒപ്പത്തിനൊപ്പം നിന്നു. മാഞ്ചസ്റ്റർ യുണൈറ്റഡിനായി ബ്രൂണോ ഫെർണാണ്ടസും മേസൺ മൗണ്ടും ഗോളുകൾ നേടിയപ്പോൾ, എവർട്ടണിനായി ഇലിമാൻ എൻഡിയായെയും ബ്രാൻഡൻ ഹെവന്റെ ഓൺ ഗോളുമാണ് വന്നത്.

കളിയുടെ 19-ാം മിനിറ്റിൽ പെനാൽറ്റിയിലൂടെ ഫെർണാണ്ടസ് യുണൈറ്റഡിനെ മുന്നിലെത്തിച്ചു. എന്നാൽ ആദ്യ പകുതി അവസാനിക്കുന്നതിന് തൊട്ടുമുമ്പ്, മികച്ച പ്രകടനം കാഴ്ചവെച്ച എൻഡിയായെ എവർട്ടണിനായി സമനില ഗോൾ നേടി. 69-ാം മിനിറ്റിൽ മനോഹരമായൊരു ഫിനിഷിംഗിലൂടെ മൗണ്ട് വീണ്ടും യുണൈറ്റഡിന് ലീഡ് സമ്മാനിച്ചു. എന്നാൽ ആ ആവേശം അധികം നീണ്ടുനിന്നില്ല. 75-ാം മിനിറ്റിൽ ബ്രാൻഡൻ ഹെവന്റെ ഓൺ ഗോൾ എവർട്ടണിനെ വീണ്ടും സമനിലയിലെത്തിച്ചു.

യുണൈറ്റഡിന്റെ പുതിയ സൈനിംഗ് ബ്രയാൻ എംബ്യൂമോ ഇന്ന് തന്റെ അരങ്ങേറ്റം കുറിച്ചു. മാഞ്ചസ്റ്റർ യുണൈറ്റഡ് ഇനി ഓഗസ്റ്റ് 9ന് ഫിയിറെന്റീനയെ നേരിടും.