സ്പാനിഷ് ലാ ലീഗയിൽ കഴിഞ്ഞ കളിയിൽ റയൽ മാഡ്രിഡിനെ അട്ടിമറിച്ച വിയ്യറയലിന് ഇന്ന് തോൽവി. റയൽ വയ്യഡോയിഡ് ആണ് വിയ്യറയലിന് 2-1 ന്റെ പരാജയം സമ്മാനിച്ചത്. മത്സരത്തിൽ പന്ത് കൈവശം വക്കുന്നതിൽ വിയ്യറയൽ ആധിപത്യം ഉണ്ടായിട്ടും നിരവധി ഷോട്ടുകൾ ഉതിർത്തിട്ടും അവർക്ക് ജയിക്കാൻ ആയില്ല. മത്സരത്തിൽ രണ്ടാം മിനിറ്റിൽ തന്നെ വിയ്യറയൽ ഗോൾ വഴങ്ങി. മൊറോക്കൻ താരം സലിം അമാല്ലാ കെയിൽ ലാറിന്റെ പാസിൽ നിന്നാണ് വിയ്യറയൽ വല കുലുക്കിയത്. 15 മത്തെ മിനിറ്റിൽ സാമുവൽ ചുക്വുസെ വിയ്യറയലിന് ആയി ഗോൾ നേടിയെങ്കിലും വാർ ഈ ഗോൾ അനുവദിച്ചില്ല.
34 മത്തെ മിനിറ്റിൽ സലിം അമാല്ലായുടെ പാസിൽ നിന്നു ഗോൾ കണ്ടത്തിയ മറ്റൊരു മൊറോക്കൻ താരം ജവാദ് എൽ യമിഖ് വിയ്യറയലിന് അടുത്ത അടി നൽകി. തുടർന്ന് സമനില ഗോളുകൾക്ക് ആയി വിയ്യറയൽ കിണഞ്ഞു പരിശ്രമിച്ചു. ഇടക്ക് ഒരു ഷോട്ട് പോസ്റ്റിൽ തട്ടി മടങ്ങുകയും ചെയ്തു. മത്സരത്തിന്റെ അവസാന നിമിഷങ്ങളിൽ 74 മത്തെ മിനിറ്റിൽ പകരക്കാരനായി ഇറങ്ങിയ ഏതൻ കപൗയുടെ ഗോളിൽ ഒരു ഗോൾ അവർ മടക്കി. അർജന്റീന താരം ലൊ സെൽസയുടെ പാസിൽ നിന്നായിരുന്നു കപൗയുടെ ഗോൾ. എന്നാൽ തുടർന്ന് സമനില ഗോൾ കണ്ടത്താൻ അവർക്ക് ആയില്ല. നിലവിൽ വിയ്യറയൽ അഞ്ചാമത് നിൽക്കുമ്പോൾ റയൽ വയ്യഡോയിഡ് പതിനാലാം സ്ഥാനത്തേക്ക് ഉയർന്നു.
