പകരക്കാരനായി ഇറങ്ങി ഇരട്ട ഗോളുകൾ നേടിയ ഒലിവിയെ ജിറൂദിന്റെ പിൻബലത്തിൽ ബൾഗേറിയക്കെതിരായ സൗഹൃദ മത്സരത്തിൽ അനായാസ ജയവുമായി ഫ്രാൻസ്. ഏകപക്ഷീയമായ മൂന്ന് ഗോളുകൾക്കാണ് ഫ്രാൻസ് ബൾഗേറിയയെ പരാജയപ്പെടുത്തിയത്.
അതെ സമയം ജയത്തിലും ഫ്രാൻസ് ടീമിലേക്ക് തിരികെയെത്തിയ റയൽ മാഡ്രിഡ് താരം കരീം ബെൻസേമക്ക് പരിക്കേറ്റത് ഫ്രാൻസിന് തിരിച്ചടിയായി. ഹെഡ് ചെയ്യാനുള്ള ശ്രമത്തിനിടെ നിലത്ത് വീണാണ് ബെൻസേമക്ക് പരിക്കേറ്റത്.
മത്സരത്തിന്റെ ആദ്യ പകുതിയിൽ ബൈസിക്കിൾ കിക്കിലൂടെ അന്റോണിയോ ഗ്രീസ്മാൻ ആണ് ഫ്രാൻസിന് ആദ്യ ഗോൾ നേടിക്കൊടുത്തത്. തുടർന്ന് രണ്ടാം പകുതിയിൽ പകരക്കാരനായി ഇറങ്ങിയ ജിറൂദ് മത്സരത്തിന്റെ 83,90 മിനിറ്റുകളിൽ ഗോളുകൾ നേടി ഫ്രാൻസിന്റെ ജയം ഉറപ്പിക്കുകയായിരുന്നു.
