താൽക്കാലിക പരിശീലകൻ ദിനിസിനെ പുറത്താക്കിയ ബ്രസീൽ അവരുടെ പുതിയ പരിശീലകനായി സാവോ പോളോയുടെ മാനേജർ ഡോറിവൽ ജൂനിയറിനെ എത്തിക്കും. ഡോറിവൽ ബ്രസീലിന്റെ ക്ഷണം സ്വീകരിച്ചതായാണ് റിപ്പോർട്ടുകൾ. അടുത്ത ദിവസങ്ങളിൽ തന്നെ ഈ നീക്കം ഔദ്യോഗികമാകും. സാവോ പോളോ ഡോറിവൽ ജൂനിയറിന്റെ കരാർ അവസാനിപ്പിക്കാൻ 4.5 ദശലക്ഷം ബ്രസീലിയൻ റിയൽ (ഏകദേശം $922,600) നൽകാൻ CBF-നോട് ആവശ്യപ്പെട്ടിട്ടുണ്ട്.
സാന്റോസ്, ഫ്ലെമെംഗോ, അത്‌ലറ്റിക്കോ മിനെറോ എന്നിങ്ങനെ ഇതുവരെയുള്ള തന്റെ കരിയറിൽ 10-ലധികം ക്ലബ്ബുകളിൽ ഡോറിവൽ പ്രവർത്തിച്ചിട്ടുണ്ട്. 22 വർഷത്തിലേറെ പരിശീലന പരിചയമുണ്ട് 61 കാരനായ ഡോറിവാളിന്.
മൂന്ന് ബ്രസീലിയൻ കപ്പുകൾ അദ്ദേഹം പരിശീലകനായി നേടിയിട്ടുണ്ട്. അത് തന്റെ നിലവിലെ ക്ലബ്ബായ സാവോ പോളോ എഫ്‌സിയിലും മുമ്പ് 2021-22, 2009-10 സീസണുകളിൽ യഥാക്രമം ഫ്ലെമെംഗോ, സാന്റോസ് എഫ്‌സി എന്നിവയ്‌ക്കൊപ്പവും ബ്രസീലിയൻ കപ്പ് നേടി. എന്നാൽ ഇതുവരെ ബ്രസീലിയൻ ലീഗ് നേടിയിട്ടില്ല.
