ആദ്യ മിനുറ്റിൽ ഗോൾ വഴങ്ങി, പിന്നെ തിരിച്ചടിച്ചു!! ബാഴ്സലോണ പോയിന്റ് പട്ടികയിൽ ഒന്നാമത്
സ്പോട്ടിഫൈ കാമ്പ് നൗവിൽ നടന്ന ലാ ലിഗ പോരാട്ടത്തിൽ ആലവേസിനെ 3-1ന് തകർത്ത് ബാഴ്സലോണ ലീഗ് പട്ടികയിൽ 34 പോയിന്റുമായി താൽക്കാലികമായി ഒന്നാം സ്ഥാനത്ത് എത്തി. മത്സരത്തിന്റെ ആദ്യ മിനിറ്റിൽ തന്നെ പാബ്ലോ ഇബാനെസിലൂടെ ആലവേസ് ലീഡ് നേടിയതോടെ, ഒരു ഞെട്ടലോടെയാണ് മത്സരം ആരംഭിച്ചത്. എന്നാൽ റഫീഞ്ഞയുടെ അസിസ്റ്റിൽ ലാമിൻ യമാൽ 8-ാം മിനിറ്റിൽ ഗോൾ നേടി ബാഴ്സലോണയ്ക്ക് സമനില നൽകി.
26-ാം മിനിറ്റിൽ ഡാനി ഓൾമോ നിർണായകമായ ഗോൾ കൂടി നേടിയതോടെ ആതിഥേയർ മത്സരത്തിൽ മുന്നിലെത്തി. ഈ ഗോളും റഫീഞ്ഞയുടെ അസിസ്റ്റ് ആയിരുന്നു. മത്സരത്തിന്റെ ഭൂരിഭാഗം സമയവും ബാഴ്സലോണ നിയന്ത്രിച്ചു, സമ്മർദ്ദം നിലനിർത്തുകയും അവസരങ്ങൾ സൃഷ്ടിക്കുകയും ചെയ്തു. രണ്ടാം പകുതിയിൽ മാർക്കസ് റാഷ്ഫോർഡ്, ജൂൾസ് കൗണ്ടെ, പെഡ്രി, ഫെറാൻ ടോറസ് എന്നിവരെ സബ്സ്റ്റിറ്റ്യൂട്ട് ചെയ്തത് ടീമിന്റെ ആധിപത്യം നിലനിർത്താൻ പ്രധാന പങ്ക് വഹിച്ചു.
ആലവേസ് തിരിച്ചടിക്കാൻ ശ്രമിച്ചെങ്കിലും, ഇഞ്ചുറി ടൈമിൽ (90+3′) ഡാനി ഓൾമോ നേടിയ രണ്ടാം ഗോളിലൂടെ ബാഴ്സലോണ 3-1ന്റെ അന്തിമ വിജയം ഉറപ്പിച്ചു.
ഈ വിജയത്തോടെ ലാ ലിഗ സ്റ്റാൻഡിംഗിൽ ബാഴ്സലോണ 34 പോയിന്റുമായി ഒന്നാമതെത്തി, 32 പോയിന്റുകളുള്ള റയൽ മാഡ്രിഡിനെക്കാൾ ഒരു മത്സരം കൂടുതൽ ബാഴ്സലോണ കളിച്ചിട്ടുണ്ട്.