9 പന്തിൽ 27 റൺസ് നേടിയ ശ്രീനിലിന്റെ മികവിൽ യുഎസ്ടി ബ്ലൂവിനെ അവസാന പന്തിൽ മറികടന്ന് ആര്‍ആര്‍ഡി കോബ്രാസിന് ടിപിഎൽ 2020 കിരീടം. ആദ്യം ബാറ്റ് ചെയ്ത യുഎസ്ടി മനീഷ് സുകുമാരന്‍ നായര്‍ നേടിയ 34 റൺസിന്റെ ബലത്തിൽ 7 വിക്കറ്റ് നഷ്ടത്തിൽ 8 ഓവറിൽ 68 റൺസ് നേടിയപ്പോള്‍ അവസാന പന്തിലാണ് 6 വിക്കറ്റ് വിജയം ആര്‍ആര്‍ഡി കോബ്രാസ് നേടിയത്.
രണ്ടോവര്‍ അവശേഷിക്കവെ 29 റൺസ് വേണ്ടിയിരുന്ന ആര്‍ആര്‍ഡി കോബ്രാസിന് വേണ്ടി ശ്രീനിൽ ഉതിര്‍ത്ത രണ്ട് സിക്സുകള്‍ ലക്ഷ്യം 9 പന്തിൽ 16 ആക്കി കുറച്ചു. ഇതിന് ശേഷം 3 റൺസ് കൂടി വന്നപ്പോള്‍ അവസാന ഓവറിൽ 13 ആയി മാറി ലക്ഷ്യം.
ശ്രീനില്‍ അവസാന ഓവറിലെ ആദ്യ പന്തിൽ ബീറ്റൺ ആയപ്പോള്‍ അടുത്ത പന്തിൽ സിക്സും അതിന്റെ അടുത്ത പന്തിൽ സിംഗിളും ശ്രീനിൽ നേടിയപ്പോള്‍ ലക്ഷ്യം 3 പന്തിൽ ആറായി. ശരത് മോഹന്‍ അടുത്ത പന്ത് ബൗണ്ടറി നേടിയപ്പോള്‍ 2 പന്തിൽ രണ്ടായി മാറി. അടുത്ത പന്തിൽ ശരത് മോഹന്‍ റണ്ണൗട്ടായപ്പോള്‍ ലക്ഷ്യം അവസാന പന്തിൽ 2 റൺസായി.
ശ്രീനിൽ നൽകിയ അവസരം യുഎസ്ടി ബ്ലൂ കൈവിട്ടപ്പോള്‍ ചാമ്പ്യന്‍ പട്ടം സ്വന്തമാക്കുവാന്‍ ആര്‍ആര്‍ഡി കോബ്രാസിന് സാധിച്ചു. ആര്‍ആര്‍ഡിയ്ക്ക് വേണ്ടി വൈശാഖ് 15 റൺസും അന്‍വര്‍ഷാ 11 റൺസും നേടിയപ്പോള്‍ ശ്രീനിൽ രാജിന്റെ എണ്ണം പറഞ്ഞ 4 സിക്സുകളാണ് മത്സരം മാറ്റി മറിച്ചത്.
സെമി ഫൈനൽ മത്സരങ്ങള്‍ ആര്‍ആര്‍ഡി കോബ്രാസ് അലയന്‍സ് വൈറ്റ്സിനെതിരെ 7 വിക്കറ്റ് വിജയം നേടിയപ്പോള്‍ യുഎസ്ടി ബ്ലൂ അലയന്‍സ് ബ്ലൂവിനെ പരാജയപ്പെടുത്തിയാണ് ഫൈനലില്‍ കടന്നത്.
