സത്യം പറഞ്ഞാല്‍ ഭ്രാന്തനെന്ന് മുദ്രകുത്തും, ക്യാപ്റ്റന്‍സി നഷ്ടമായതിനെക്കുറിച്ച് യൂനിസ് ഖാന്‍

- Advertisement -

2017ല്‍ അന്താരാഷ്ട്ര ക്രിക്കറ്റില്‍ നിന്ന് വിരമിക്കുമ്പോള്‍ മുന്‍ പാക്കിസ്ഥാന്‍ താരം യൂനിസ് ഖാന്‍ 17 വര്‍ഷം പാക്കിസ്ഥാന് വേണ്ടി കളിച്ചിട്ടുണ്ടായിരുന്നു. ടെസ്റ്റില്‍ പാക്കിസ്ഥാന്റെ ഏറ്റവും ഉയര്‍ന്ന സ്കോര്‍ നേടിയ താരം കൂടിയാണ് യൂനിസ് ഖാന്‍, പാക്കിസ്ഥാന്‍ സൃഷ്ടിച്ച ഏറ്റവും മികച്ച ബാറ്റ്സ്മാന്‍.

2009 ടി20 ലോകകപ്പില്‍ ടീമിനെ കിരീടത്തിലേക്ക് നയിക്കുവാനും യൂനിസ് ഖാന് സാധിച്ചിരുന്നു. എന്നാല്‍ ഈ വിജയത്തിന് ആറ് മാസത്തിന് ശേഷം യൂനിസ് ഖാനെ ക്യാപ്റ്റന്‍സിയില്‍ നിന്ന് പുറത്താക്കുകയായിരുന്നു. ചില താരങ്ങള്‍ക്ക് യൂനിസ് ക്യാപ്റ്റനാവുന്നതില്‍ എതിര്‍പ്പുണ്ടായിരുന്നു എന്നതിനിലാണ് ഈ തീരുമാനമെന്നാണ് പിന്നീട് അറിയുവാന്‍ കഴിഞ്ഞത്.

എന്നാല്‍ താന്‍ സത്യസന്ധനായതിനാലാണ് തന്റെ ക്യാപ്റ്റന്‍സി നഷ്ടമായതെന്നാണ് യൂനിസ് ഖാന്‍ പറയുന്നത്. ചില താരങ്ങള്‍ ആവശ്യത്തിന് ആത്മാര്‍ത്ഥത കാണിച്ചില്ലെന്നും അത് ചോദ്യം ചെയ്തപ്പോളാണ് തന്നെ പുറത്താക്കേണ്ട സാഹചര്യം ഉണ്ടായതെന്നും യൂനിസ് ഖാന്‍ വ്യക്തമാക്കി.

സത്യം തുറന്ന് പറഞ്ഞാല്‍ പലപ്പോളും നമ്മള്‍ ഭ്രാന്തനാണെന്ന് മുദ്ര കുത്തപ്പെടും, അതാണ് തനിക്കും സംഭവിച്ചതെന്ന് യൂനിസ് ഖാന്‍ വ്യക്തമാക്കി. പിന്നീട് ആ താരങ്ങള്‍ തന്നോട് വന്ന് മാപ്പ് പറഞ്ഞുവെന്നത് വേറെ കാര്യമാണെന്നും യൂനിസ് ഖാന്‍ വ്യക്തമാക്കി.

Advertisement