ഈ ലോകകപ്പില്‍ ഉപയോഗിക്കുന്ന പന്തുകള്‍ മുന്‍ ലോകകപ്പുകളില്‍ നിന്ന വ്യത്യസ്തമാണെന്നും അതിനാല്‍ തന്നെ കൂടുതല്‍ സ്വിംഗ് ലഭിയ്ക്കുന്നുവെന്നും പറഞ്ഞ് ന്യൂസിലാണ്ട് താരം ട്രെന്റ് ബോള്‍ട്ട്. അടുത്തിടെ ഏകദിനത്തിലെ തന്റെ ഏകദിനത്തിലെ 150 വിക്കറ്റുകള്‍ ബംഗ്ലാദേശിനെതിരെയുള്ള മത്സരത്തില്‍ ട്രെന്റ് ബോള്‍ട്ട് പൂര്‍ത്തിയാക്കിയിരുന്നു. മിച്ചല്‍ സ്റ്റാര്‍ക്ക് 77 മത്സരങ്ങളില്‍ നിന്ന് ഈ നേട്ടം സ്വന്തമാക്കിയപ്പോള്‍ ബോള്‍ട്ട് 81 മത്സരങ്ങളില്‍ നിന്നാണ് ഇവ സ്വന്തമാക്കിയത്.
ബോളുകളില്‍ ഷൈനും നിറം കൊടുത്ത രീതിയും എല്ലാം വളരെ വ്യത്യസ്തമായ രീതിയിലാണുള്ളതെന്നും പുതിയവ കൈയ്യില്‍ പിടിക്കുവാനും കൂടുതല്‍ സുഖകരമാണെന്നും തനിയ്ക്ക് ഈ പന്തില്‍ പൂര്‍ണ്ണ തൃപ്തിയുണ്ടെന്നും ട്രെന്റ് ബോള്‍ട്ട് പറഞ്ഞു. തുടക്കത്തിലെ സാഹചര്യങ്ങള്‍ കഴിഞ്ഞാലും പിന്നെയും ബൗളര്‍മാര്‍ക്ക് ഇതിനാല്‍ മികച്ച പിന്തുണ ലഭിയ്ക്കുന്നുണ്ടെന്നും ബോള്‍ട്ട് വ്യക്തമാക്കി.
