അഫ്ഗാനിസ്ഥാനെതിരെ നേരിയതെങ്കിലും ഒന്നാം ഇന്നിംഗ്സ് ലീഡ് നേടി വിന്‍ഡീസ്. 187 റണ്‍സിന് അഫ്ഗാനിസ്ഥാനെ പുറത്താക്കിയ ശേഷം ഇന്ന് രണ്ടാം ദിവസം 68/2 എന്ന നിലയില്‍ ബാറ്റിംഗ് പുനരാരംഭിച്ച കരീബിയന്‍ സംഘം ഉച്ച ഭക്ഷണത്തിന് പിരിയുമ്പോള്‍ 195/5 എന്ന നിലയിലാണ്. 8 റണ്‍സിന്റെ ലീഡാണ് വിന്‍ഡീസിനുള്ളത്.
ജോണ്‍ കാംപെല്‍-ബ്രൂക്സ് കൂട്ടുകെട്ട് മൂന്നാം വിക്കറ്റില്‍ 82 റണ്‍സ് നേടി വിന്‍ഡീസിനെ മുന്നോട്ട് നയിച്ചുവെങ്കിലും അമീര്‍ ഹംസ 55 റണ്‍സ് നേടിയ കാംപെല്ലിനെ പുറത്താക്കി അധികം കൈവാതെ ഷിമ്രണ്‍ ഹെറ്റ്മ്യറിനെ(13)റഷീദ് ഖാനും റോഷ്ടണ്‍ ചേസിനെ(2) സഹീര്‍ ഖാനും പുറത്താക്കിയിരുന്നു.
150/5 എന്ന നിലയില്‍ വീണ ടീമിനെ പിന്നീട് മുന്നോട്ട് നയിച്ചത് ബ്രൂക്ക്സും ഷെയിന്‍ ഡോവ്റിച്ചും ചേര്‍ന്നാണ്. ആറാം വിക്കറ്റില്‍ 45 റണ്‍സാണ് കൂട്ടുകെട്ട് ഇതുവരെ നേടിയിട്ടുള്ളത്.
129 പന്തില്‍ 75 റണ്‍സുമായി ബ്രൂക്ക്സും 25 റണ്‍സ് നേടിയ ഷെയിന്‍ ഡോവ്റിച്ചും വലിയ ലീഡിലേക്ക് വിന്‍ഡീസിനെ രണ്ടാം സെഷനില്‍ നയിക്കുമെന്നാണ് കരുതപ്പെടുന്നത്.
