ടോസ് നേടി ബാറ്റിംഗ് തിരഞ്ഞെടുത്ത വിന്‍ഡീസിനു മികച്ച സ്കോര്‍. ഓപ്പണര്‍മാരും ഡാരെന്‍ ബ്രാവോ, നിക്കോളസ് പൂരന്‍ എന്നിവരുടെ പുറത്താകാതെയുള്ള വെടിക്കെട്ട് ബാറ്റിംഗ് കൂടി ചേര്‍ന്നപ്പോള്‍ 20 ഓവറില്‍ 3 വിക്കറ്റ് നഷ്ടത്തില്‍ വിന്‍ഡീസ് 181 റണ്‍സ് നേടുകയായിരുന്നു. ഒന്നാം വിക്കറ്റില്‍ ഓപ്പണര്‍മാരായ ഷായി ഹോപ്(24), ഷിമ്രണ്‍ ഹെറ്റ്മ്യര്‍(26) കൂട്ടുകെട്ട് 51 റണ്‍സ് നേടിയ ശേഷം പിന്നീട് ബ്രാവോ-പൂരന്‍ വെടിക്കെട്ടാണ് ചെന്നൈയില്‍ അരങ്ങേറിയത്.
43 പന്തില്‍ നിന്ന് 87 റണ്‍സാണ് ഇരുവരും ചേര്‍ന്ന് നേടിയത്. പൂരന്‍ 25 പന്തില്‍ 53 റണ്‍സുമായി പുറത്താകാതെ നിന്നപ്പോള്‍ ഡാരെന്‍ ബ്രാവോ 37 പന്തില്‍ 43 റണ്‍സ് നേടി. 4 സിക്സുകളാണ് നിക്കോളസ് പൂരന്‍ തന്റെ അപരാജിതമായ ഇന്നിംഗ്സില്‍ നേടിയത്. ഡാരെന്‍ ബ്രാവോ രണ്ട് സിക്സ് സ്വന്തമാക്കി. ഇന്ത്യയ്ക്കായി യൂസുവേന്ദ്ര ചഹാല്‍ രണ്ടും വാഷിംഗ്ടണ്‍ സുന്ദര്‍ ഒരു വിക്കറ്റും നേടി.
