പകരം വീട്ടി ബംഗാള്‍ ടൈഗേഴ്സ്, മറാത്ത അറേബ്യന്‍സിനെ കീഴടക്കി മൂന്നാം സ്ഥാനം

രണ്ടാം ക്വാളിഫയറില്‍ മറാത്ത അറേബ്യന്‍സിനോട് പരാജയമേറ്റു വാങ്ങിയതിന്റെ പ്രതികാരം തീര്‍ത്ത് ബംഗാള്‍ ടൈഗേഴ്സ്. മൂന്നാം സ്ഥാനത്തിനുള്ള പോരാടത്തില്‍ മറാത്ത അറേബ്യന്‍സിനെതിരെ 6 വിക്കറ്റിന്റെ വിജയമാണ് ഇന്ന് ബംഗാള്‍ ടൈഗേഴ്സ് സ്വന്തമാക്കിയത്. ആദ്യം ബാറ്റ് ചെയ്ത മറാത്ത അറേബ്യന്‍സ് 121/6 എന്ന സ്കോര്‍ നേടിയപ്പോള്‍ 5 പന്ത് ശേഷിക്കെ 4 വിക്കറ്റ് നഷ്ടത്തില്‍ ബംഗാള്‍ ടൈഗേഴ്സ് വിജയം കുറിച്ചു.

ആഡം ലിത്ത്(24 പന്തില്‍ 52), ഹസ്രത്തുള്ള സാസായി(15 പന്തില്‍ 39) എന്നിവരാണ് അറേബ്യന്‍സിനായി തിളങ്ങിയത്. ബംഗാളിനു വേണ്ടി അലി ഖാനും മുജീബ് ഉര്‍ റഹ്മാനും രണ്ട് വീതം വിക്കറ്റ് നേടി.

ഷെര്‍ഫെയ്‍ന്‍ റൂഥര്‍ഫോര്‍ഡിന്റെ ബാറ്റിംഗ് മികവിലാണ് ബംഗാള്‍ ടൈഗേഴ്സിന്റെ വിജയം. 21 പന്തില്‍ 46 റണ്‍സ് നേടിയ ഷെര്‍ഫെയ്‍നൊപ്പം മുഹമ്മദ് ഉസ്മാന്‍ 9 പന്തില്‍ 28 റണ്‍സുമായി തിളങ്ങിയപ്പോള്‍ റിക്കി വെസ്സല്‍സ്(3 പന്തില്‍ 11*) സാം ബില്ലിംഗ്സ്(10*) എന്നിവര്‍ പുറത്താകാതെ ടീമിനെ വിജയത്തിലേക്ക് നയിച്ചു. 9.1 ഓവറിലാണ് ടീമിന്റെ വിജയം.