ഇംഗ്ലണ്ട് താരം ജോണി ബൈര്‍സ്റ്റോയുടെ വെടിക്കെട്ട് ബാറ്റിംഗ് പ്രകടനത്തില്‍ ജയം സ്വന്തമാക്കി കേരള നൈറ്റ്സ്. ഇന്ന് നടന്ന ആദ്യ മത്സരത്തില്‍ ആദ്യം ബാറ്റ് ചെയ്ത ബംഗാള്‍ ടൈഗേഴ്സ് 123/5 എന്ന സ്കോര്‍ നേടിയപ്പോള്‍ 8.4 ഓവറില്‍ ജയം സ്വന്തമാക്കി കേരള നൈറ്റ്സ്. 7 വിക്കറ്റിന്റെ ജയമാണ് ടീം സ്വന്തമാക്കിയത്.
ബംഗാള്‍ ടൈഗേഴ്സിനു വേണ്ടി 25 പന്തില്‍ 52 റണ്‍സ് നേടിയ സുനില്‍ നരൈനും 39 റണ്‍സ് നേടി ഷെര്‍ഫെയ്ന്‍ റൂഥര്‍ഫോര്‍ഡുമാണ് തിളങ്ങിയത്. വെയിന്‍ പാര്‍ണെല്‍, ബെന്നി ഹോവെല്‍ എന്നിവര്‍ നൈറ്റ്സിനായി 2 വിക്കറ്റ് നേടി.
നരൈന്‍ ക്രിസ് ഗെയിലിനെയും(19) നബി പോള്‍ സ്റ്റിര്‍ലിംഗ്(10) ഓയിന്‍ മോര്‍ഗന്‍(0) എന്നിവരെയും പുറത്താക്കിയെങ്കിലും ബൈര്‍സ്റ്റോയുടെ ഒറ്റയാള്‍ പ്രകടനം ബംഗാള്‍ ടൈഗേഴ്സിനെ മുക്കി കളയുകയായിരുന്നു. 24 പന്തില്‍ നിന്ന് 6 ബൗണ്ടറിയും 8 സിക്സും അടക്കമാണ് ബൈര്‍സ്റ്റോ 84 റണ്‍സുമായി ആളിക്കത്തിയത്.
