സഞ്ജുവിന് അര്‍ദ്ധ ശതകം, മികച്ച ഫോം തുടര്‍ന്ന് സച്ചിന്‍ ബേബി പക്ഷേ കേരളത്തിന് തോല്‍വി

രാജസ്ഥാനെതിരെ കേരളത്തിന് സയ്യദ് മുഷ്താഖ് അലി ട്രോഫിയില്‍ പരാജയം. കേരളത്തിനെതിരെ ഏഴ് വിക്കറ്റ് വിജയമാണ് രാജസ്ഥാന്‍ സ്വന്തമാക്കിത്. ആദ്യം ബാറ്റ് ചെയ്ത കേരള ആറ് വിക്കറ്റ് നഷ്ടത്തില്‍ 164 റണ്‍സ് നേടിയപ്പോള്‍ രാജസ്ഥാന്‍ ലക്ഷ്യ 3 വിക്കറ്റ് നഷ്ടത്തില്‍ 17 ഓവറില്‍ മറികടന്നു. കേരളത്തിനായി സഞ്ജു സാംസണ്‍ 53 റണ്‍സ് നേടി മികച്ച ഫോമില്‍ ബാറ്റ് വീശി. 39 പന്തില്‍ നേരിട്ട സഞ്ജു റണ്ണൗട്ടാവുകയായിരുന്നു. മികച്ച ഫോമിലുള്ള സച്ചിന്‍ ബേബി 29 പന്തില്‍ നിന്ന് 47 റണ്‍സ് നേടി പുറത്തായി. 36 റണ്‍സ് നേടിയ ഓപ്പണര്‍ വിഷ്ണു വിനോദ് ആണ് മറ്റൊരു പ്രധാന സ്കോറര്‍. രാജസ്ഥാന് വേണ്ടി ദീപക് ലോകേന്ദ്ര ചാഹ്ര, ഖലീല്‍ അഹമ്മദ് എന്നിവര്‍ രണ്ട് വിക്കറ്റ് നേടി.

രാജസ്ഥാന് വേണ്ടി 51 പന്തില്‍ നിന്ന് 76 റണ്‍സ് നേടിയ രാജേഷ് ബിഷ്ണോയിയും 22 പന്തില്‍ നിന്ന് 44 റണ്‍സ് നേടിയ അര്‍ജിത് ഗുപ്തയും ആണ് ബാറ്റിംഗില്‍ തിളങ്ങിയത്. ഇരുവരും പുറത്താകാതെ നിന്ന് 17 ഓവറില്‍ ടീമിന്റെ ജയം ഉറപ്പാക്കുകയായിരുന്നു. 84 റണ്‍സ് നാലാം വിക്കറ്റ് കൂട്ടുകെട്ടാണ് പുറത്താകാതെ ഇരുവരും ചേര്‍ന്ന് നേടിയത്. അങ്കിത് ലാംബ 19 പന്തില്‍ 35 റണ്‍സ് നേടി മികച്ച തുടക്കം രാജസ്ഥാന് നല്‍കി.