ന്യൂസിലാണ്ടിനെതിരെ അഞ്ചാം ഏകദിനത്തില്‍ തലയ്ക്ക് ഏറ് കൊണ്ടതിനാല്‍ ഷൊയ്ബ് മാലിക് ടി20 പരമ്പരയില്‍ കളിക്കുകയില്ല. മെഡിക്കല്‍ ടീമുമായി ചര്‍ച്ച നടത്തിയ ശേഷമാണ് താരത്തിനു വിശ്രമം അനുവദിക്കാമെന്ന് പാക്കിസ്ഥാന്‍ ടൂര്‍ മാനേജ്മെന്റ് കമ്മിറ്റി തീരുമാനത്തിലെത്തിയത്. ഹാമിള്‍ട്ടണിലെ അഞ്ചാം ഏകദിനത്തിനിടെ റണ്‍ ഓടി എടുക്കുന്നതിനിടെയാണ് കോളിന്‍ മണ്‍റോ എറിഞ്ഞ പന്ത് നേരെ മാലികിന്റെ തലയില്‍ ഇടിച്ചത്. തലയിലിടിച്ച പന്ത് ബൗണ്ടറിയിലേക്ക് പോകുകയും ചെയ്തു.
ഹെല്‍മറ്റ് ധരിക്കാതിരുന്ന ഷൊയ്ബ് മാലിക് ഉടന്‍ ഗ്രൗണ്ടില്‍ വീഴുകയും പിന്നീട് ബാറ്റിംഗ് തുടരാന്‍ ഫിസിയോയുടെ സഹായം തേടുകയും ചെയ്തിരുന്നു. സംഭവത്തിനു ശേഷം 6 പന്തുകള്‍ക്ക് ശേഷം മാലിക് പുറത്താകുകയും ചെയ്തു. താരത്തിനു അസ്വാസ്ഥ്യം അനുഭവപ്പെടുന്നുവെന്നും മെഡിക്കല്‍ പദം അനുസരിച്ച് “ഡിലെയ്ഡ് കണ്‍കഷന്‍” ആണെന്നുമാണ് മെഡിക്കല്‍ ടീമിന്റെ വിശദീകരണം.
കൂടുതൽ കായിക വാർത്തകൾക്ക് : www.facebook.com/FanportOfficial
