ബംഗ്ലാദേശിന്റെ നാട്ടിലെയും മറുനാട്ടിലെയും ടെസ്റ്റ് മത്സരങ്ങള്‍ ഉപേക്ഷിക്കപ്പെട്ടതോടെ ടീമിന് 8 മത്സരങ്ങളാണ് നഷ്ടമാകുന്നത്. ഇത് തീരാനഷ്ടമാണെന്നാണ് ക്യാപ്റ്റന്‍ മോമിനുള്‍ ഹക്ക് പറയുന്നത്. ശ്രീലങ്കയിലേക്കുള്ള ടീമിന്റെ പര്യടനവും ബംഗ്ലാദേശിലേക്കുള്ള ന്യൂസിലാണ്ട് പര്യടനവും കൂടാതെ ഓസ്ട്രേലിയ പാക്കിസ്ഥാന്‍ എന്നിവരോടുമുള്ള മത്സരങ്ങളാണ് ഇപ്പോള്‍ മാറ്റി വെച്ചത്.
ഈ മത്സരങ്ങളില്‍ ടീമിനെ നയിക്കുവാനുള്ള അവസരം നഷ്ടമായത് വളരെ ദുഖകരമാണെന്ന് മോമിനുള്ള വ്യക്തമാക്കി. എട്ടോളം മത്സരങ്ങളിലാണ് തനിക്ക് ഇതിനുള്ള അവസരം നഷ്ടമായത്. അതും മികച്ച ടീമുകള്‍ക്കെതിരെയായിരുന്നു ഈ മത്സരങ്ങളെന്നും മോമിനുള്‍ സൂചിപ്പിച്ചു.
എന്നാല്‍ ഇപ്പോളത്തെ സാഹചര്യത്തില്‍ പ്രത്യേകിച്ച് ഒന്നും ചെയ്യാനില്ലെന്നും നമ്മുടെ നിയന്ത്രണത്തിലുള്ള കാര്യങ്ങളല്ല നടക്കുന്നതെന്നും മോമിനുള്‍ വ്യക്തമാക്കി.
