യാൻ ഡിയോമാൻഡെയ്ക്കായി ലിവർപൂൾ രംഗത്ത്; ചർച്ചകൾ ആരംഭിച്ച് ഇംഗ്ലീഷ് ക്ലബ്ബ്

ടീമിലേക്ക് പുതിയ യുവതാരങ്ങളെ എത്തിക്കാനുമുള്ള നീക്കങ്ങൾ ശക്തമാക്കി ലിവർപൂൾ. ജർമ്മൻ ക്ലബ്ബായ ആർബി ലെയ്പ്സിഗിന്റെ പത്തൊൻപതുകാരനായ സൂപ്പർ ഫോർവേഡ് യാൻ ഡിയോമാൻഡെയെ സ്വന്തമാക്കാനാണ് ലിവർപൂൾ ഇപ്പോൾ കടുത്ത ശ്രമങ്ങൾ നടത്തുന്നത്. ‘ദി അത്ലറ്റിക്’ റിപ്പോർട്ട് പ്രകാരം ലിവർപൂൾ മാനേജ്‌മെന്റ് ലെയ്പ്സിഗുമായി ഇതിനോടകം തന്നെ പ്രാഥമിക ചർച്ചകൾ നടത്തിക്കഴിഞ്ഞു. താരത്തെ ടീമിലെത്തിക്കാൻ നിലവിൽ ഏറ്റവും കൂടുതൽ സാധ്യത കൽപ്പിക്കപ്പെടുന്നത് ലിവർപൂളിനാണെങ്കിലും, വളരെ വലിയൊരു തുക ലഭിക്കാതെ താരത്തെ വിട്ടുകൊടുക്കില്ലെന്ന കർശന നിലപാടിലാണ് ലെയ്പ്സിഗ്.

ഈ സീസണിൽ ജർമ്മനിയിൽ തകർപ്പൻ പ്രകടനമാണ് ഡിയോമാൻഡെ പുറത്തെടുത്തത്. എല്ലാ ടൂർണമെന്റുകളിലുമായി കളിച്ച 36 മത്സരങ്ങളിൽ നിന്ന് 13 ഗോളുകളും 10 അസിസ്റ്റുകളും ഈ യുവതാരം സ്വന്തമാക്കി. സൂപ്പർ താരം മുഹമ്മദ് സലാ ക്ലബ്ബ് വിട്ട സാഹചര്യത്തിൽ ലിവർപൂളിന്റെ ആക്രമണ നിരയ്ക്ക് ഏറ്റവും അനുയോജ്യനായ താരം ഡിയോമാൻഡെ ആയിരിക്കുമെന്നാണ് ലിവർപൂൾ മാനേജ്‌മെന്റ് വിലയിരുത്തുന്നത്. എന്നാൽ ലെയ്പ്സിഗ് താരത്തിനായി ചോദിക്കുന്ന വൻ തുക നൽകാൻ ലിവർപൂൾ തയ്യാറാകുമോ എന്നതാണ് നിലവിലുള്ള പ്രധാന ചോദ്യം.

റിപ്പോർട്ടുകൾ പ്രകാരം 130 മില്യൺ യൂറോയിലധികം (€130 million) ഡിയോമാൻഡെയ്ക്കായി ലെയ്പ്സിഗ് ആവശ്യപ്പെട്ടേക്കും.

മുഹമ്മദ് സലായുടെ പകരക്കാരനെ കണ്ടെത്തുക എന്നത് ലിവർപൂളിന് വലിയൊരു വെല്ലുവിളിയാണെങ്കിലും ഈ നീക്കം അവർക്ക് ഗുണം ചെയ്യുമെന്നാണ് വിലയിരുത്തൽ. വിങ്ങുകളിൽ മികച്ച വേഗതയും കളി കൈപ്പിടിയിലൊതുക്കാനുള്ള കഴിവും കൃത്യമായ ഫിനിഷിങ്ങും ഒരുപോലെ ഒത്തിണങ്ങിയ ഒരു താരത്തെയാണ് ലിവർപൂളിന് ഇപ്പോൾ ആവശ്യം. നിലവിലെ ഫോമിൽ യൂറോപ്പിലെ തന്നെ ഏറ്റവും കൂടുതൽ ചർച്ച ചെയ്യപ്പെടുന്ന യുവ ഫോർവേഡായ ഡിയോമാൻഡെയിൽ ഈ മൂന്ന് ഗുണങ്ങളും ഒത്തുചേർന്നിട്ടുണ്ട്. വരാനിരിക്കുന്ന ട്രാൻസ്ഫർ ജാലകത്തിൽ ഈ വമ്പൻ തുക മുടക്കി ഡിയോമാൻഡെയെ ആൻഫീൽഡിൽ എത്തിക്കാൻ ലിവർപൂളിന് സാധിക്കുമോ എന്നാണ് ഫുട്ബോൾ ലോകം ഉറ്റുനോക്കുന്നത്.