രോഹിത് ശർമ്മ ഏകദിന റാങ്കിംഗിൽ മൂന്നാം സ്ഥാനത്തേക്ക് ഉയർന്നു

ഇന്ത്യയുടെ ചാമ്പ്യൻസ് ട്രോഫി വിജയത്തിന് പിന്നാലെ ഐസിസിയുടെ ഏറ്റവും പുതിയ ഏകദിന റാങ്കിംഗിൽ ക്യാപ്റ്റൻ രോഹിത് ശർമ്മക്ക് മുന്നേറ്റം. ഫൈനലിൽ ന്യൂസിലൻഡിനെതിരെ നേടിയ 76 റൺസ് രോഹിത് ശർമ്മയെ മൂന്നാം സ്ഥാനത്തേക്ക് ഉയർത്തി.

784 പോയിൻ്റുമായി ശുഭ്മാൻ ഗിൽ ഒന്നാം സ്ഥാനത്തും 770 പോയിൻ്റുമായി പാക്കിസ്ഥാൻ്റെ ബാബർ അസം രണ്ടാം സ്ഥാനത്തും തുടരുന്നു. വിരാട് കോലി 736 പോയിൻ്റുമായി അഞ്ചാം സ്ഥാനത്തേക്ക് പിന്തള്ളപ്പെട്ടപ്പോൾ 704 പോയിൻ്റുമായി ശ്രേയസ് അയ്യർ എട്ടാം സ്ഥാനം നിലനിർത്തി.

ബൗളിംഗ് റാങ്കിംഗിൽ 680 പോയിൻ്റുമായി ശ്രീലങ്കയുടെ മഹേഷ് തീക്ഷണ ഒന്നാം സ്ഥാനത്തും ന്യൂസിലൻഡിൻ്റെ മിച്ചൽ സാൻ്റ്നർ 657 പോയിൻ്റുമായി രണ്ടാം സ്ഥാനത്തേക്കും ഉയർന്നു. ടൂർണമെൻ്റിൽ ഏഴ് വിക്കറ്റ് വീഴ്ത്തിയ ഇന്ത്യയുടെ കുൽദീപ് യാദവ് 650 പോയിൻ്റുമായി മൂന്നാം സ്ഥാനത്തേക്ക് ഉയർന്നു. രവീന്ദ്ര ജഡേജയും 616 പോയിൻ്റുമായി 10-ാം സ്ഥാനത്തു തിരിച്ചെത്തി.