യുഎഇയിലേത് പോലെ സ്പിന്നര്‍മാര്‍ക്ക് മേൽക്കൈ ലഭിയ്ക്കുന്ന പിച്ചാണ് റാവൽപിണ്ടിയിലേതെന്ന് പറഞ്ഞ് ഓസീസ് സ്പിന്നര്‍ നഥാന്‍ ലയൺ. ആദ്യ ടെസ്റ്റിന്റെ മുന്നോടിയായുള്ള പരിശീലന സെഷന് ശേഷം പിച്ച് പരിശോധിച്ച ശേഷം പ്രതികരിക്കുകയായിരുന്നു താരം.
ഫ്ലാറ്റായ പുല്ലില്ലാത്ത ട്രാക്ക് യുഎഇയിലെ പിച്ചുകളോട് സാമ്യമുള്ളതാണെന്നാണ് ലയണിന്റെ ആദ്യ പ്രതികരണം. പ്രധാന വിക്കറ്റിന്റെ മൂന്ന് പിച്ച് അപ്പുറം ആണ് പരിശീലനം നടത്തിയതെന്നും ബാറ്റിംഗിന് ആദ്യ ദിവസങ്ങളിൽ അനുകൂലമായ പിച്ചിൽ പിന്നീട് സ്പിന്നും റിവേഴ്സ് സ്വിംഗിനും മേൽക്കൈ ലഭിയ്ക്കുമെന്നാണ് കരുതുന്നതെന്ന് ലയൺ പറഞ്ഞു.
പിച്ചിനെ അടിസ്ഥാനമാക്കിയായിരിക്കും അന്തിമ ഇലവനെന്നും രണ്ട് സ്പിന്നര്‍മാരെ ഉള്‍പ്പെടുത്തുവാനുള്ള സാധ്യത തള്ളിക്കളയുന്നില്ലെന്നും ലാബൂഷാനെ, സ്മിത്ത്, ട്രാവിസ് ഹെഡ് എല്ലാവരും സ്പിന്‍ എറിയുവാന്‍ സജ്ജരാണെന്നും ലയൺ സൂചിപ്പിച്ചു.
