സിഡ്നിയിലെ ആദ്യ ഏകദിനത്തില്‍ 71 റണ്‍സ് വിജയം കരസ്ഥമാക്കി ഓസ്ട്രേലിയ. ഇന്ന് ആദ്യം ബാറ്റ് ചെയ്ത ഓസ്ട്രേലിയ 258 റണ്‍സ് ഏഴ് വിക്കറ്റ് നഷ്ടത്തില്‍ നേടിയപ്പോള്‍ മറുപടി ബാറ്റിംഗിനിറങ്ങിയ ന്യൂസിലാണ്ട് 41 ഓവറില്‍ 187 റണ്‍സിന് ഓള്‍ഔട്ട് ആകുകയായിരുന്നു. മിച്ചല്‍ മാര്‍ഷും പാറ്റ് കമ്മിന്‍സും മൂന്ന് വീതം വിക്കറ്റ് നേടിയാണ് ന്യൂസിലാണ്ടിന്റെ നടുവൊടിച്ചത്. മിച്ചല്‍ മാര്‍ഷ് ആണ് കളിയിലെ താരം. ബാറ്റിംഗില്‍ മാര്‍ഷ് 27 റണ്‍സ് നേടിയിരുന്നു.
40 റണ്‍സുമായി മാര്‍ട്ടിന്‍ ഗപ്ടില്‍ ടീമിന്റെ ടോപ് സ്കോറര്‍ ആയപ്പോള്‍ ടോം ലാഥം 38 റണ്‍സും കോളിന്‍ ഡി ഗ്രാന്‍ഡോം 25 റണ്‍സും നേടി പൊരുതി നോക്കി. ഓസീസ് നിരയില്‍ ജോഷ് ഹാസല്‍വുഡ്, ആഡം സംപ എന്നിവര്‍ക്കും രണ്ട് വീതം വിക്കറ്റ് ലഭിച്ചു.
