ഇന്ത്യയ്ക്കെതിരെ ഇന്‍ഡോറിലെ രണ്ടാം ഇന്നിംഗ്സില്‍ എട്ട് വിക്കറ്റ് നേടിയെങ്കിലും താന്‍ ഇപ്പോളും ഇന്ത്യന്‍ ബാറ്റ്സ്മാന്മാര്‍ക്കെതിരെ ബൗള്‍ ചെയ്യുവാന്‍ പഠിച്ചിട്ടില്ലെന്ന് പറഞ്ഞ് നഥാന്‍ ലയൺ. വിരാട് കോഹ്‍ലി, ചേതേശ്വര്‍ പുജാര പോലുള്ള മുന്‍ നിര ബാറ്റ്സ്മാന്മാരുടെ വിക്കറ്റ് ലഭിയ്ക്കുവാന്‍ തനിക്ക് ഭാഗ്യമുണ്ടായിയെന്നാണ് കരുതുന്നതെന്ന് ലയൺ കൂട്ടിചേര്‍ത്തു.
തന്റെ ആവനാഴിയിൽ ഒട്ടനവധി ആയുധങ്ങളില്ലെന്നും എന്നാൽ തനിക്ക് തന്റെ സ്റ്റോക്ക് ബോളിൽ ഏറെ വിശ്വാസമുണ്ടെന്നും ആ ആത്മവിശ്വാസം ക്രിക്കറ്റ് ലോകത്തിൽ വലിയ കാര്യം തന്നെയാണെന്നും ലയൺ പറഞ്ഞു.
തനിക്ക് വെല്ലുവിളികള്‍ ഇഷ്ടമാണെന്നും അതിനാൽ തന്നെ മികവ് പുലര്‍ത്തുമ്പോള്‍ സന്തോഷം ഏറെയുണ്ടെന്നും ലയൺ വ്യക്തമാക്കി.
