ഇന്ത്യയില്‍ ആദ്യമായി ഓസ്ട്രേലിയയെ ടി20 പരമ്പര വിജയം നേടിക്കൊടുക്കുവാന്‍ സഹായിച്ച ഗ്ലെന്‍ മാക്സ്വെല്ലിന്റെ പ്രകടനം താരത്തിനു ടി20 ലോക റാങ്കിംഗില്‍ മൂന്നാം സ്ഥാനത്തേക്ക് എത്തുവാന്‍ സഹായിച്ചു. പരമ്പരയിലെ രണ്ട് മത്സരങ്ങളില്‍ നിന്നായി 56, 113* എന്നീ സ്കോറുകള്‍ നേടിയ താരം രണ്ട് സ്ഥാനം മെച്ചപ്പെടുത്തിയാണ് മൂന്നാം റാങ്കിലേക്ക് ഉയര്‍ന്നത്.
കെഎല്‍ രാഹുല്‍ നാല് സ്ഥാനം മെച്ചപ്പെടത്തി ആറാം റാങ്കിലേക്ക് ഉയരുകയായിരുന്നു. ആദ്യ മത്സരത്തില്‍ അര്‍ദ്ധ ശതകം നേടിയ രാഹുല്‍ രണ്ടാം മത്സരത്തില്‍ 47 റണ്‍സ് നേടി പുറത്താകുകയായിരുന്നു. വിരാട് കോഹ്‍ലിയ്ക്കും(17ാം റാങ്ക്) എംഎസ് ധോണിയ്ക്കും(56ാം റാങ്ക്) റാങ്കിംഗില്‍ നേട്ടം ഉണ്ടായിട്ടുണ്ട്.
