ഇന്ത്യന്‍ താരങ്ങളെ വിദേശ ലീഗുകളില്‍ കളിക്കുവാന്‍ അനുവദിക്കണമെന്ന് നേരത്തെ സുരേഷ് റെയ്‍നയും ഇര്‍ഫാന്‍ പത്താനും ആവശ്യപ്പെട്ടിരുന്നു. ചുരുങ്ങിയത് രണ്ട് വിദേശ ലീഗുകളിലെങ്കിലും താരങ്ങളെ കളിക്കുവാന്‍ അനുവദിക്കണമെന്നാണ് റെയ്‍ന ആവശ്യപ്പെട്ടത്. ഇപ്പോള്‍ ഇതേ ആവശ്യവുമായി മുന്‍ ചെന്നൈ സൂപ്പര്‍ കിംഗ്സ് താരം മന്‍പ്രീത് ഗോണിയും രംഗത്തെത്തിയിട്ടുണ്ട്.
സുരേഷ് റെയ്‍നയ്ക്കൊപ്പം ഐപിഎലില്‍ ചെന്നൈ സൂപ്പര്‍ കിംഗ്സില്‍ കളിച്ചിട്ടുള്ള താരമാണ് മന്‍പ്രീത് ഗോണി. ഐപിഎല്‍ കളിച്ച് ഇന്ത്യന്‍ ടീമില്‍ കളിക്കാന്‍ സാധിക്കുന്ന അനവധി താരങ്ങളുണ്ട്. അത് പോലെ തന്നെ രഞ്ജി കളിച്ചിട്ടും ഐപിഎല്‍ കളിക്കാനാകാത്ത കുറേയെറെ താരങ്ങളുണ്ട്. അത്തരം താരങ്ങളെയെങ്കിലും വിദേശ ലീഗുകളില്‍ കളിക്കുവാന്‍ അനുവദിക്കണമെന്നാണ് ഗോണി പറയുന്നത്.
ഇത്തരം താരങ്ങളെ വിദേശ ലീഗുകളില്‍ പോയി കളിച്ച് കൂടുതല്‍ പണം സമ്പാദിച്ച് തങ്ങളുടെ കുടുംബം പുലര്‍ത്തുവാനുള്ള അവസരം കൊടുക്കണമെന്നും മന്‍പ്രീത് ഗോണി വ്യക്തമാക്കി.
