ഇംഗ്ലണ്ടിനെതിരെ ആദ്യം ബാറ്റ് ചെയ്ത് ബാറ്റിംഗ് തകര്‍ച്ച നേരിട്ടുവെങ്കിലും വിരാട് കോഹ്‍ലിയുടെ ബാറ്റിംഗ് മികവില്‍ 6 വിക്കറ്റ് നഷ്ടത്തില്‍ 156 റണ്‍സ് നേടി ഇന്ത്യ. 46 പന്തില്‍ 77 റണ്‍സാണ് കോഹ്‍ലി നേടിയത്. ആറാം വിക്കറ്റില്‍ ഹാര്‍ദ്ദിക് പാണ്ഡ്യയുമായി ചേര്‍ന്ന് താരം 33 പന്തില്‍ നിന്ന് 70 റണ്‍സിന്റെ കൂട്ടുകെട്ടാണ് നേടിയത്. കോഹ്‍ലി എട്ട് ഫോറും നാല് സിക്സുമാണ് ഇന്ന് തന്റെ ഇന്നിംഗ്സില്‍ നേടിയത്.
മാര്‍ക്ക് വുഡ് കെഎല്‍ രാഹുല്‍, രോഹിത് ശര്‍മ്മ, ശ്രേയസ്സ് അയ്യര്‍ എന്നിവരെ പുറത്താക്കിയപ്പോള്‍ പ്രതീക്ഷ നല്‍കിയ ഋഷഭ് പന്ത്(25) റണ്ണൗട്ട് രൂപത്തില്‍ പുറത്തായി.
ഒരു ഘട്ടത്തില്‍ 24/3 എന്ന നിലയിലേക്ക് വീണ ഇന്ത്യയെ കോഹ്‍ലിയും പന്തും ചേര്‍ന്ന് 40 റണ്‍സ് നേടി മുന്നോട്ട് നയിക്കുന്നതിനിടയിലാണ് പന്ത് പുറത്തായത്. 37 പന്തില്‍ നിന്നാണ് കോഹ്‍ലി തന്റെ അര്‍ദ്ധ ശതകം നേടിയത്.
അര്‍ദ്ധ ശതകം തികച്ച ശേഷം സിക്സുകളും ബൗണ്ടറിയും നേടി കോഹ്‍ലി ആക്രമണം അഴിച്ചുവിടുകയായിരുന്നു. തന്റെ ആദ്യ മൂന്നോവറില്‍ വെറും 14 റണ്‍സിന് മൂന്ന് വിക്കറ്റ് നേടിയ മാര്‍ക്ക് വുഡിന്റെ അവസാന ഓവറില്‍ നിന്ന് കോഹ്‍ലി രണ്ട് സിക്സം ഒരു ഫോറും അടക്കം നേടിയപ്പോള്‍ ഓവറില്‍ നിന്ന് 17 റണ്‍സാണ് പിറന്നത്.
ഇന്ത്യന്‍ ഇന്നിംഗ്സിലെ അവസാന പന്തില്‍ 17 റണ്‍സ് നേടിയ ഹാര്‍ദ്ദിക് പാണ്ഡ്യയെ പുറത്താക്കി ക്രിസ് ജോര്‍ദ്ദന്‍ മത്സരത്തിലെ തന്റെ രണ്ടാം വിക്കറ്റ് നേടി.
