ന്യൂസിലൻഡിനെതിരായ ടി20 പരമ്പര: കേശവ് മഹാരാജ് ദക്ഷിണാഫ്രിക്കയെ നയിക്കും

2026-ലെ ടി20 ലോകകപ്പിന് പിന്നാലെ ന്യൂസിലൻഡിൽ നടക്കാനിരിക്കുന്ന അഞ്ച് മത്സരങ്ങളടങ്ങിയ ടി20 പരമ്പരയ്ക്കുള്ള ദക്ഷിണാഫ്രിക്കൻ ടീമിനെ പ്രഖ്യാപിച്ചു. ഇടങ്കയ്യൻ സ്പിന്നർ കേശവ് മഹാരാജ് ആണ് ടീമിനെ നയിക്കുന്നത്. മാർച്ച് 15-നാണ് പരമ്പര ആരംഭിക്കുന്നത്. ലോകകപ്പിന് പിന്നാലെ ഐ.പി.എൽ ആരംഭിക്കാനിരിക്കുന്നതിനാൽ പ്രധാന താരങ്ങൾക്ക് വിശ്രമം നൽകിക്കൊണ്ടാണ് ദക്ഷിണാഫ്രിക്ക ടീമിനെ പ്രഖ്യാപിച്ചിരിക്കുന്നത്. ലോകകപ്പ് ടീമിലുണ്ടായിരുന്ന കേശവ് മഹാരാജ്, ജോർജ്ജ് ലിൻഡെ, ജേസൺ സ്മിത്ത് എന്നിവർ മാത്രമാണ് ന്യൂസിലൻഡിലേക്ക് തിരിക്കുന്നത്.

അഞ്ച് പുതുമുഖ താരങ്ങളെ ഉൾപ്പെടുത്തിക്കൊണ്ട് യുവത്വത്തിന് മുൻഗണന നൽകുന്ന രീതിയിലാണ് ടീം സെലക്ഷൻ. എൻകോബാനി മൊക്കോയേന, ജോർദാൻ ഹെർമൻ, കോണർ എസ്റ്റർഹ്യൂസൻ, ഇത്താൻ ബോഷ്, ഡിയാൻ ഫോറെസ്റ്റർ എന്നിവരാണ് ടീമിലെ പുതുമുഖങ്ങൾ. പരിക്കിനെത്തുടർന്ന് ലോകകപ്പ് നഷ്ടമായ ഫാസ്റ്റ് ബൗളർമാരായ ജെറാൾഡ് കോട്‌സീയും ഒട്ടീൽ ബാർട്ട്മാനും ടീമിലേക്ക് തിരിച്ചെത്തിയിട്ടുണ്ട്. ഹാംസ്ട്രിംഗ് പരിക്കിൽ നിന്ന് മോചിതനായി ടോണി ഡി സോർസിയും ടീമിൽ ഇടംനേടി. വനിതാ ടീമിനൊപ്പമുള്ള ഡബിൾ ഹെഡർ മത്സരങ്ങളായിട്ടായിരിക്കും ഈ പരമ്പര നടക്കുക.

പ്രധാന താരങ്ങൾക്ക് വിശ്രമം നൽകുന്നതിനോടൊപ്പം യുവതാരങ്ങൾക്ക് അന്താരാഷ്ട്ര അനുഭവം നൽകുക എന്ന ലക്ഷ്യത്തോടെയാണ് ഈ മാറ്റങ്ങളെന്ന് പരിശീലകൻ ശുക്രി കോൺറാഡ് പറഞ്ഞു. എസ്.എ 20 ലീഗിലെ മികച്ച പ്രകടനമാണ് പല യുവതാരങ്ങളെയും ടീമിലെത്തിക്കാൻ സഹായിച്ചത്. കേശവ് മഹാരാജിന്റെ ശാന്തമായ നേതൃപാടവം യുവതാരങ്ങൾ നിറഞ്ഞ ഈ ടീമിന് കരുത്താകുമെന്നാണ് ദക്ഷിണാഫ്രിക്കൻ ക്രിക്കറ്റ് ബോർഡിന്റെ പ്രതീക്ഷ. മാർച്ച് 25-നാണ് പരമ്പരയിലെ അവസാന മത്സരം നടക്കുന്നത്.

South Africa squad for T20I series in New Zealand

Keshav Maharaj (capt), Ottneil Baartman, Eathan Bosch, Gerald Coetzee, Tony de Zorzi, Connor Esterhuizen, Dian Forrester, Jordan Hermann, Rubin Hermann, George Linde, Nqobani Mokoena, Andile Simelane, Lutho Sipamla, Prenelan Subrayen, and Jason Smith