പൃഥ്വി ഷായെയും ഋഷഭ് പന്തിനെയും പോലുള്ള ബാറ്റ്സ്മാന്മാരെ നിയന്ത്രിക്കാന്‍ ശ്രമിക്കരുതെന്നാണ് തന്റെ കാഴ്ചപ്പാടെന്ന് പറഞ്ഞ് ഡല്‍ഹി ക്യാപിറ്റല്‍സ് നായകന്‍ ശ്രേയസ്സ് അയ്യര്‍. പന്തിനെയും പൃഥ്വിയെയും അവരുടെ സാധാരണ ശൈലിയില്‍ മാറ്റം വരുത്തുവാന്‍ ശ്രമിക്കുന്നത് അവരുടെ കളിയെ ബാധിയ്ക്കുമെന്നാണ് താന്‍ കരുതുന്നത്. അവരെ അവരുടെ സ്വതസിദ്ധമായ ശൈലിയില്‍ ബാറ്റ് വീശുവാനാണ് സമ്മതിക്കേണ്ടതെന്നാണ് തന്റെ അഭിപ്രായമെന്നും അയ്യര്‍ പറഞ്ഞു. സണ്‍റൈസേഴ്സിനെതിരെ ഇരുവരും ഒരുമിച്ച് ഫോമായത് വളരെ നല്ല കാര്യമാണെന്നും അയ്യര്‍ പറഞ്ഞു.
തന്റെ വികാരങ്ങളെ നിയന്ത്രിക്കുവാന്‍ താന്‍ പാട് പെടുകയാണ്. എല്ലാവരുടെയും മുഖത്ത് സന്തോഷമാണ് കാണാനാകുന്നത്. ചെന്നൈയ്ക്കെതിരെയുള്ള മത്സരം കൂടി ജയിക്കാനാകുമെന്നാണ് തങ്ങള്‍ പ്രതീക്ഷിക്കുന്നതെന്നും ശ്രേയസ്സ് അയ്യര്‍ പറഞ്ഞു. സണ്‍റൈസേഴ്സിനെതിരെ ഇത്തരം ട്രാക്കില്‍ ലഭിച്ച തുടക്കമാണ് കളി മാറ്റി മറിച്ചതെന്നും ശ്രേയസ്സ് അയ്യര്‍ പറഞ്ഞു.
