വനിന്ദു ഹസരംഗ ടെസ്റ്റ് വിരമിക്കലിൽ നിന്ന് യു-ടേൺ എടുത്തത് ടെസ്റ്റ് കളിക്കാനുള്ള താല്പര്യം കൊണ്ടാണ് എന്ന് കരുതിയെങ്കിൽ അത് തെറ്റി. ഐ സി സി നിയമങ്ങളിലെ പഴുതുകൾ മനസ്സിലാക്കിയുള്ള ശ്രീലങ്കയുടെ ഒരു ഗംഭീര നീക്കമായിരുന്നു ഇത്. ഹസരംഗയുടെ മേലുള്ള ഐ സി സി വിലക്ക് മറികടക്കാനുള്ള നീക്കം.
ഹസരംഗ അമ്പയർമാരോട് തർക്കിച്ചതിന് ഐ സി സി വിലക്ക് കിട്ടിയ താരമാണ്. 4 ടി20 മത്സരങ്ങളോ 2 ടെസ്റ്റ് മത്സരങ്ങളോ ആയിരുന്നു താരത്തിന് കിട്ടിയ വിലക്ക്. ഇനി വരാനിരിക്കുന്ന ടി20 മത്സരം ടി20 ലോകകപ്പിലാണ്. ലോകകപ്പിൽ നാലു മത്സരങ്ങൾ ഹസരംഗയ്ക്ക് നഷ്ടമാകുമായിരുന്നു. ഇത് ഒഴിവാക്കാൻ ആണ് ഹസരംഗ ടെസ്റ്റ് വിരമിക്കൽ പിൻവലിച്ചത്. ഇതോടെ ബംഗ്ലാദേശിന് എതിരായ 2 ടെസ്റ്റ് മത്സരങ്ങൾക്ക് ആയുള്ള ടീമിൽ ഹസരംഗയെ ഉൾപ്പെടുത്തി.
വിലക്ക് കാരണം ഹസരംഗയ്ക്ക് ഈ 2 ടെസ്റ്റും കളിക്കാൻ ആകില്ല. ഈ ടെസ്റ്റുകളോടെ വിലക്ക് അവസാനിക്കും. അതിനാൽ ടി20 ലോകകപ്പിൽ ആദ്യ മത്സരം മുതൽ ഹസരംഗയ്ക്ക് കളിക്കാൻ ആകും. ശ്രീലങ്കയുടെ ബുദ്ധിപരമായ നീക്കം. മാത്രമല്ല ടെസ്റ്റ് പരമ്പരയിൽ വിലക്ക് നേരിടുന്നതിനാൽ ഹസരംഗയ്ക്ക് അടുത്ത ദിവസം തന്നെ ഇന്ത്യയിലേക്ക് വന്ന് തന്റെ ഐ പി എൽ ടീമായ സൺ റൈസേഴ്സിനൊപ്പം ചേരുകയും ചെയ്യാം. ഐ പി എല്ലിൽ ഹസരംഗയ്ക്ക് ഒറ്റ മത്സരവും നഷ്ടമാകില്ല എന്നും ഉറപ്പായി.
