ഗബ്രിയേൽ ഇനി ഈ സീസണിൽ കളിക്കില്ല, ആഴ്സണലിന് വൻ തിരിച്ചടി
ആഴ്സണൽ പ്രതിരോധ താരം ഗബ്രിയേലിന് പരിക്കിനെ തുടർന്ന് ശസ്ത്രക്രിയ ആവശ്യമാണെന്ന് സ്ഥിരീകരിച്ചതിനെ തുടർന്ന് സീസണിന്റെ ശേഷിക്കുന്ന മത്സരങ്ങൾ അദ്ദേഹത്തിന് നഷ്ടമാകും എന്ന് ഉറപ്പായി. ഫുൾഹാമിനെതിരായ ആഴ്സണലിന്റെ പ്രീമിയർ ലീഗ് മത്സരത്തിനിടെയാണ് ബ്രസീലിയൻ സെന്റർ ബാക്കിന് പരിക്കേറ്റത്.
റയൽ മാഡ്രിഡിനെതിരായ യുവേഫ ചാമ്പ്യൻസ് ലീഗ് ക്വാർട്ടർ ഫൈനൽ പോരാട്ടത്തിന് ദിവസങ്ങൾക്ക് മുമ്പ്, ആഴ്സണലിന് നിർണായകമായ ഒരു സമയത്താണ് ഈ തിരിച്ചടി വരുന്നത്. സീസണിലെ ഏറ്റവും വലിയ മത്സരങ്ങളിലൊന്നിനായി ഗണ്ണേഴ്സ് തയ്യാറെടുക്കുമ്പോൾ, ഗബ്രിയേലിന്റെ അഭാവം മൈക്കൽ അർട്ടെറ്റയുടെ പദ്ധതികൾക്ക് കനത്ത തിരിച്ചടിയാകും.
ഗബ്രിയേൽ ഉടൻ തന്നെ പുനരധിവാസം ആരംഭിക്കുമെന്നും അടുത്ത സീസണിന്റെ തുടക്കത്തിൽ അദ്ദേഹം തിരിച്ചെത്തുമെന്നും ക്ലബ് സ്ഥിരീകരിച്ചു.