സഞ്ജു സാംസൺ വേറെ ലെവലിൽ ആണ് കളിക്കുന്നത്; സഞ്ജുവിന്റെ പ്രകടനത്തെ പ്രശംസിച്ച് ആരോൺ ഫിഞ്ച്

രവീന്ദ്ര ജഡേജയ്ക്കും സാം കറനും പകരമായി ചെന്നൈ സൂപ്പർ കിംഗ്‌സിലെത്തിയ സഞ്ജു സാംസൺ, ഐപിഎൽ 2026-ൽ വിസ്മയിപ്പിക്കുന്ന പ്രകടനമാണ് പുറത്തെടുക്കുന്നത്. സീസണിന്റെ തുടക്കത്തിൽ ആദ്യ മൂന്ന് മത്സരങ്ങളിൽ ഒറ്റയക്കത്തിന് പുറത്തായപ്പോൾ വിമർശനങ്ങൾ ഉയർന്നെങ്കിലും, പിന്നീട് തകർപ്പൻ ഫോമിലേക്ക് താരം തിരിച്ചെത്തി. ഡൽഹി ക്യാപിറ്റൽസിനെതിരെ പ്രയാസകരമായ പിച്ചിൽ 52 പന്തിൽ പുറത്താകാതെ നേടിയ 87 റൺസ് സഞ്ജുവിന്റെ സിഎസ്കെ കരിയറിലെ മികച്ച ഇന്നിംഗ്‌സുകളിലൊന്നായി മാറി.

സഞ്ജുവിന്റെ ഈ കുതിപ്പിനെ ‘ഇഎസ്പിഎൻ ക്രിക്ഇൻഫോ ടൈംഔട്ട്’ ഷോയിൽ മുൻ ഓസ്‌ട്രേലിയൻ നായകൻ ആരോൺ ഫിഞ്ച് പ്രശംസിച്ചു. “ആദ്യ രണ്ട് മത്സരങ്ങളിൽ തിളങ്ങാൻ കഴിയാതിരുന്നപ്പോൾ സിഎസ്‌കെ എന്ത് തീരുമാനമാണ് എടുത്തതെന്ന് കരുതി എല്ലാവരും പരിഭ്രാന്തരായി. എന്നാൽ ടി20 ക്രിക്കറ്റിൽ രണ്ട് മത്സരങ്ങൾ എന്നത് ഒന്നുമല്ല. ഒരു സീസണിലുടനീളം സ്ഥിരതയോടെ കളിക്കുക എന്നത് ഏറെ പ്രയാസകരമാണ്. സഞ്ജു ഇപ്പോൾ മറ്റൊരു തലത്തിലാണ് ബാറ്റ് ചെയ്യുന്നത്, അത് കാണുന്നത് തന്നെ സന്തോഷകരമാണ്,” ഫിഞ്ച് പറഞ്ഞു.

സഞ്ജുവിന്റെ ബാറ്റിംഗ് മികവിനെ മുൻ ഇന്ത്യൻ താരം ദീപ് ദാസ്ഗുപ്തയും പ്രശംസിച്ചു. കഴിഞ്ഞ കുറേ വർഷങ്ങളായി ആരാധകർ കാണാൻ ആഗ്രഹിച്ച സഞ്ജു സാംസണാണിതെന്നാണ് അദ്ദേഹം അഭിപ്രായപ്പെട്ടത്.

നിലവിൽ ഈ സീസണിൽ 57.42 ശരാശരിയിലും 167.50 സ്ട്രൈക്ക് റേറ്റിലും 402 റൺസ് സഞ്ജു നേടിക്കഴിഞ്ഞു. സഞ്ജുവിന്റെ ഈ മികച്ച ഫോം ചെന്നൈ സൂപ്പർ കിംഗ്‌സിനെ പോയിന്റ് പട്ടികയിൽ ആറാം സ്ഥാനത്തെത്തിച്ചിട്ടുണ്ട്.